Бугун финал! "Фиорентина" бу сафар ғалабага эриша оладими ёки "Олимпиакос" кубокни Грецияда олиб қоладими?

Бугун Греция пойтахти Афина шаҳридаги “OPAP Arena”да УЕФА Конференциялар лигасининг 2023/2024 йилги мавсум финал учрашуви бўлиб ўтади.

Ҳал қилувчи баҳсда мезбон Грециянинг “Олимпиакос” клуби Италиянинг “Фиорентина” жамоасига қарши саф тортади.

"Олимпиакос" бу мавсумда Конференциялар лигасида жуда катта шовқин кўтарди. Греклар ярим финалда мусобақа фаворити дея эътироф этилаётган Унаи Эмери бошчилигидаги “Астон Вилла” йўлдан олиб ташлашди. "Олимпиакос" инглизлардан ташқари плей-оффда "Фенербахче", "Маккаби Тел-Авив" ва "Ференcварос"ни мағлуб этди.

"Фиорентина" учун бу финал нафақат нуфузли совринни қўлга киритиш, балки ўтган мавсумдаги натижаларини яхшилаш имкониятини беради. Флоренция жамоаси бир йил олдин айнан Конференциялар лигаси финалида майдонга тушган ва "Вест Хэм"га ютқазганди. “Фиорентина”нинг бу йилги финал йўли ҳам экзотик бўлди: “Брага”, “Сивасспор”, “Лех” ва “Базел”.

“Олимпиакос” – “Фиорентина” учрашуви Тошкент вақти билан соат 00:00 да бошланади.