Бугун илк бор ЦСКА - "Андижон" тўқнашуви. Ўйин олдидан маълумотлар

Анталияда қишки ўқув-машғулотини олиб бораётган “Андижон” олдиндан режалаштирилганидек, 1 февраль куни Москванинг ЦСКА клубига қарши назорат баҳсида майдонга тушади. Бу тарихий ўйин. Чунки илгари мазкур жамоалар тўқнаш келишмаган. “Андижон” матбуот хизмати эса ўз режасига биноан бўлажак учрашув олдидан номдор рақиб ҳақида маълумот тақдим этади.

ЦСКА – бу Россиянинг энг таниқли ва етакчи жамоаларидан бири. Барча мухлислар “армиячилар”нинг қандай салоҳиятга эга эканини яхши биладилар. Айни пайтда Россия чемпионатида биринчи даврадан кейин ЦСКА турнир жадвалида 8-ўринни эгаллаб турибди. Улар ҳозирда чемпионатнинг иккинчи даврасига тайёргарлик кўришяпти.

Аввалига БААнинг Абу-Даби шаҳрида йиғин ўтказишди. У ерда Оманнинг “Сохар” ва Москванинг “Торпедо”сига қарши ўртоқлик учрашувларида майдонга тушишди. Аввалига “Сохар” 4:1, кейин эса “Торпедо” 3:2 ҳисобларида мағлуб этилди. 30 январь куни ЦСКА Анталияга етиб келди. Бу ерда ҳам бир қатор ўртоқлик ўйинлари ўтказилади ва уларнинг дастлабки беллашуви “Андижон”га қарши бўлиб ўтади.

ЦСКАга 57 ёшли тажрибали мутахассис Владимир Федотов бош мураббийлик қилмоқда. Владимир Валентинович мураббийлик фаолияти мобайнида “Урал”, “Металлург-Кузбасс”, “Синара”, “Оренбург”, “Арарат” (Москва), “Сочи” сингари клубларда ишлаган. 2022 йилдан эса ЦСКА устози сифатида меҳнат қилиб келяпти.

ЦСКА Россиянинг совриндор клуби. Жумладан, 13 марта мамлакат чемпионлигини қўлга киритган. Яна 13 бор кумуш ҳамда 9 маротаба бронза эгаси ҳисобланади. Россия Кубоги финалида 20 бор ўйнаган ва шундан 13 тасида муваффақият қозонган. Россия Суперкубогида эса 13 марта ғолиб чиққан. 2004/05 йилги мавсумда эса ЦСКА УЕФА Кубогини ютган. Ўшанда финалда Португалиянинг “Спортинг” жамоаси 3:1 ҳисобида таслим қилинган.

ЦСКА ўзининг уй ўйинларини муҳташам “ВЭБ Арена”да ўтказади. 2016 йили фойдаланишга топширилган стадион ўз бағрига 30114 томошабинни сиғдиради.

Биласиз, ЦСКАда ҳамюртимиз Аббос Файзуллаев тўп суряпти ва у аллақачон нафақат ўз клуби, балки Россия чемпионатининг сюрприз ҳамда ёқимтой ўйинчисига айланиб улгурган. Ҳозирда Файзуллаев Ўзбекистон миллий терма жамоаси билан Қатардаги Осиё Кубогида иштирок этаётгани сабабли табиийки клубининг йиғинларида иштирок этмаяпти.

ЦСКАнинг ҳозирги юлдузларидан бири бу Игорь Акинфеев. Таниқли ва тажрибали дарвозабон фаолиятини асосан ЦСКАга бағишлаган ва бу ерда 2003 йилдан бери дарвозани қўриқлаб келади. Бундан ташқари, Иван Обляков, Максим Мухин, Фёдор Чалов, Антон Заболотний, Кирилл Набабкин ва яна бошқа етакчи ўйинчиларга эга.

Хабарингиз бор, “Бургутлар” дастлабки ўртоқлик учрашувини 27 январь куни Жанубий Корея олимпия терма жамоасига қарши ўтказди ва унда ҳисоб очилмади – 0:0. “Андижон” – ЦСКА ўртасидаги учрашув эса бугун маҳаллий вақт билан соат 16:00 да “Регнум” аренасида бошланади. Тошкент вақтига эса 18:00 га тўғри келади. Мазкур баҳс “Андижон” матбуот хизмати томонидан тўғридан-тўғри эфирга узатилади. 

Шуҳратбек Жўраев.