Бугун Одил Аҳмедов чемпионлик учун курашни бошлайди

Хитой чемпионати ниҳоят бошланди. Февралда старт олиши керак бўлган мусобақа пандемия сабабли ярим йил ортга сурилди. Чемпионат ташкилотчилари қарорига кўра, жорий чемпионатда 16 та жамоа икки гуруҳга бўлинган ҳолда баҳс олиб боради.

Ҳар бир гуруҳдан тўрттадан жамоа плей-оффда чемпионлик учун курашни давом эттиради. Қолган жамоалар эса, юқори дивизиондаги жойини сақлаб қолиш учун ўйнайди.

Ўзбекистон терма жамоаси сардори ўйнаётган “Шанхай СИПГ” жамоаси биринчи турни сафарда “Тяньцзинь Тэда”га қарши ўтказади. Мутахассислар таркибида Оскар, Халк ва Одил Аҳмедов каби етакчи футболчилари бор “Шанхай СИПГ” жамоасининг имкониятини юқори баҳоламоқда.

“Шанхай СИПГ” жорий мавсумда чемпионликка асосий даъвогарлар қаторида зикр этилмоқда. Бунгача Одил Аҳмедов жамоаси 2018 йилда бош совринни қўлга киритган эди.