"Бундай вазиятда бизга ҳам осон эмас"! Клопп "Ливерпуль"даги катта муаммо ҳақида гапирди

АПЛ 3-туридан ўрин олган "Манчестер Юнайтед" - "Ливерпуль" учрашуви якунига етди. Мазкур беллашувда "қизил иблислар" 2:1 ҳисобида рақибдан устун келди. 

Дастлаб, Жейдон Санчо 16-дақиқада ҳисобни очди. 53-дақиқада Рэшфорд орадаги фарқни иккитага етказиб қўйди. 81-дақиқа ўтиб бораётган бир пайтда Салоҳ ҳисобни қисқартирган голга муаллифлик қилди. 

Беллашувдан сўнг мерсисайдликлар устози Юрген Клопп ўз фикрлари билан ўртоқлашиб ўтди: 

- Ўйинга тайёргарлик кўрдик. Бироқ барибир тўлиқ тайёр эмаслигимизни билардим. Бизда муаммолар етарлича.

- Ҳисоб 1:0 бўлганда, мувозанатни тиклаш муҳим. 2:0 ғалаба учун имконият камайганини англатади. Агар ҳисобни тенглаштирганимизда, ўйин сценарийси биз хоҳлаганимиздек бўларди.

- 3 учрашувда 2 очко тўпладик. Ваҳоланки, 7 очкони бой бердик. Аслида мени очколар эмас, ҳозирги вазият кўпроқ ташвишга солмоқда. Таркибда 14-15 та талабга жавоб берадиган футболчилар бор, холос. Ўйинни кучайтиришда биз анча қийналиб қоляпмиз.

- Бугун яхши вазиятлар яратган ҳолда, майдонда устунлик қилдик. Бироқ якунда барибир мағлуб бўлдик. Ғалаба қозонишимиз керак эди, десам ғалати эшитилиши мумкин. Аслида ҳам шундай. Ютишимиз шарт эди.

- Муҳими, яхшироқ ўйнаш мумкинлигини биламиз ва шунга ҳаракат қиламиз. Лекин бундай вазиятда бизга ҳам осон эмас.