"Бунёдкор" узоқ кутилган ғалабасига қандай эришди?

Суперлиганинг 15-туриндан ўрин олган “Бунёдкор” ҳамда “Андижон” жамоалари ўртасидаги беллашув “Пахтакор-79” жамоаси хотираси учун бир дақиқалик сукут сақлаш билан бошланди.

Албатта, “Бургутлар” ушбу ўйинда ижобий натижага эришиш мақсадида майдонга тушишганди. Бироқ футболда ҳар доим ҳам ўйлаган режа амалга ошавермайди. “Бунёдкор”га қарши баҳсда айнан шундай бўлди. Жамоа ўз ўйинини кўрсатишда қийинчиликка дуч келди. Бу борада “Бунёдкор” ҳам жиддий қаршилик кўрсатганини эътироф этиш лозим.

Лекин “Андижон” ёмон ўйин кўрсатгани йўқ. Баҳс бошларида  тезкор гол ҳам урганди. Аммо ҳакамлар Рустам Турдимуродовнинг голини инобатга олмадилар. Бунга тўп унинг қўлига текканини сабаб қилиб кўрсатдилар. Агар ўш вазиятда гол инобатга олинганида табиийки, ўйин сценарийси бошқача давом этган бўларди.

Биринчи бўлимда ҳисоб очилмади. Танаффусдан кейин эса мезбонлар тезкор гол урдилар. “Бунёдкор” футболчиси Музаффар Олимжонов жарима майдони ичида чаққонлик қилган ҳолда дарвозани ишғол қилди. Андижондан келган футбол ишқибозлари бутун баҳс мобайнида жамоани тинимсиз олқишлаб турдилар. Бу борада улар доимгидек фаоллигини кўрсатдилар. Футболчилар ҳам вазиятни ўзгартириш учун ҳаракат қилдилар. Лекин аксига олиб режалар ўхшамади ва 82-дақиқада майдон эгалари томонидан иккинчи гол киритилди. Бурчак зарбасидан кейин “Бунёдкор” ҳимоячиси боши билан дарвозани ишғол қилди.

Шундай қилиб, “Андижон” чемпионатда сафардаги дастлабки мағлубиятини қабул қилиб олди. 

“Бунёдкор” – “Андижон” – 2:0 (0:0).

11 август. Тошкент. “Бунёдкор” стадиони. 1358 томошабин.

Ҳакамлар: Найим Қосимов, Руслан Самандаров, Амал Султонов

Захира ҳаками: Сардор Миродилов

ВАР: Аҳрол Рисқуллаев

АВАР: Аваз Абдуллаев

Назоратчи: Тимур Абдуллаев

Комиссар: Қудрат Мадраимов

“Бунёдкор”: Марин Любич, Момчило Рашо, Бобур Йўлдошев, Шахбоз Жўрабеков (Азиз Тўлқинбеков, 90+1), Темурхўжа Абдуҳолиқов (Нажмиддин Нормуродов, 90+1), Усмонали Исмоналиев, Асадбек Раҳимжонов (Фране Киряк, 80), Итсука Урата, Амир Тўрақулов, Луис Качорри, Музаффар Олимжонов (Андрия Филипович, 72).

“Андижон”: Игорь Литовка, Владимир Бубанья, Любиша Пецель (Абдураҳмон Комилов, 68), Абдулвоҳид Ғуломов, Ислом Маматказин, Муҳаммадкарим Тоиров (Дамир Темиров, 79), Леван Арвеладзе, Бектемир Абдуманнонов (Шахром Самиев, 68), Илҳом Абдуғаниев, Фарҳод Соҳибжонов (Вагиз Галиулин, 68), Рустам Турдимуродов (Сардор Азимов, 79).

Голлар: Музаффар Олимжонов, 47 – 1:0. Бобур Йўлдошев, 82 – 2:0.

Огоҳлантиришлар: Бобур Йўлдошев, 7 - Муҳаммадкарим Тоиров, 77.