"Бургутлар" тарих ёзишда давом этмоқда. "Андижон" энди 1-ўринда. Бу қандай содир бўлди?

Суперлиганинг 5-турини бошлаб берган “Локомотив” – “Андижон” қарама-қаршилиги кутилганидек жуда шиддатли ва жанговар руҳда кечди. Александр Хомяков жамоаси ўтган турда “Насаф”га қарши қандай жанг таклиф қилган бўлса, бу сафар меҳмонда бўлишига қарамай, “Локомотив”га ҳам шундай жанг таклиф қилди.

Ўйинни томоша қилганлар маза қилишди, асло зерикиб қолишгани йўқ. Албатта, беллашувнинг асосий воқеалари иккинчи бўлимда кузатилди. Бироқ танаффусгача ҳам жамоалар очиқ ва ҳужумкор ўйин намойиш қилишди. Масалан, бир вазиятда Фарҳод Соҳибжонов ўзининг ажойиб рейдини ишга солди ва жамоадоши Бектемир Абдуманноновни бирга-бир вазиятга чиқарди. У зарба бериш чоғида дарвозабон билан тўқнашиб кетди. Ҳакам пенальти белгилади. Кейин эса ВАРни такроран кўргач, қарорини ўзгартирди. Шерзод Эсановда ҳам гол уриш имконияти бўлди. У қанотдан рейд уюштирди ва ўткир бурчак остида зарба йўллади. “Локо” посбони хавфни бартараф қилди. Мезбонларда ҳам имкониятлар бўлди. Лекин ҳисоб очилмади.

Иккинчи бўлимнинг 55-дақиқасида тиниб-тинчимас Абдуманнонов жарима зарбаси ишлади ва стандартдан тўпни ажойиб тарзда жарима майдони ичига узатди. Бу ерда ҳозиру-нозир бўлган ҳимоячи Ислом Маматказин боши билан дарвозага тўпни жойлаб қўйди. Шу тариқа, у ўзининг учинчи голини урди ва “Андижон”нинг тўпурарига айланиб олди. Голдан руҳланган “Бургутлар”нинг ҳужумлари шиддатли тус олди. Аммо “Локо” ҳам ўз уйида енгилгиси келмасди ва уларнинг ҳам ҳужумлари хавфли кўриниш олди. Шунга қарамай, 70-дақиқада “Бургутлар” иккинчи голни урдилар. Мезбонларнинг ҳужумини бартараф этган дарвозабон Игорь Литовка тезлик билан тўпни олдинги чизиқдаги ҳужумчи Шахром Самиевга узатди. Тожикистонлик ҳужумчи эса ҳимоячи билан тўп учун курашда охиригача ҳаракат қилди ва тўпни дарвоза тўрига йўллаб ҳисобни яна оширди. Бу вазиятда голга дарвозабон Литовканинг ассистентлик қилгани эътиборга молик.

0:2 дан кейин ташаббус “Андижон”га ўтди. Натижада бирин-кетин Суҳроб Султонов дарвозаси олдида голли имкониятлар яратилишда давом этди. Бектемир Абдуманнонов қанотдан хавфли рейд уюштириб, посбон билан яккама-якка чиқдию, бироқ зарбасини Султонов аранг қайтариб қолди. Яна бир вазиятда Шахром Самиев дублга эришиши мумкин эди. Аммо унинг зарбасини Султонов катта қийинчилик билан майдон ташқарисига чиқариб юборди.

Учрашув охирларида майдон эгалари томонидан шиддатли ҳужумлар уюштирилди. 85-дақиқада “Андижон”нинг собиқ футболчиси Сардор Абдунабиев ҳисобни қисқартиргач, ўйин шиддати янада “ёнди”. Лекин “Андижон” дарвозабони Игорь Литовка бир нечта вазиятда қаҳрамонлик кўрсатиб, жамоасини голлардан сақлаб қолди.

Шундай қилиб, “Андижон” жамоаси қийин ўтган беллашувда жуда муҳим уч очкони қўлга киритиб, турнир жадвалида пешқадамга айланиб олди. Футболчилар одатга кўра ғалаба завқини ашаддий мухлислари билан биргаликда нишонлади. Жамоа “Локомотив” майдонида илк бор 2007 йили ғалаба қозонган бўлиб, ўшанда 0:1 ҳисоби қайд этилганди. Орадан 17 йил ўтгач, “Андижон” иккинчи бор “Локо” майдонида уч очкони қўлга киритди. Шу тариқа, “Бургутлар” Хомяков бошчилигида тарих ёзишда давом этмоқда.

“Локомотив” – “Андижон” – 1:2 (0:0).

4 апрель. Тошкент. “Локомотив” стадиони. 837 томошабин.

Ҳакамлар: Абдурашид Худойберганов, Хусниддин Шодмонов, Шавкат Раҳматов

Захира ҳаками: Турғун Жумабоев

VAR: Аҳрол Рисқуллаев

AVAR: Никита Афиногенов

Назоратчи: Бобур Ҳайдаров

Комиссар: Жаҳонгир Раҳматуллаев

“Локомотив”: Суҳрол Султонов, Абдулазизхон Абдурашидов, Иван Рогач, Анзур Исмоилов (Иззатилла Абдуллаев, 75), Дилшод Комилов, Абдуллоҳ Йўлдошев, Санжар Турсунов, Дамьян Крайишник, Муҳаммаданас Ҳасанов, Жасур Ҳакимов (Сардор Абдунабиев, 66), Иван Булатович (Собит Синдаров, 85).

“Андижон”: Игорь Литовка, Абдувоҳид Ғуломов, Ислом Маматказин, Владимир Бубанья, Сардор Азимов, Леван Арвеладзе, Шерзод Эсанов (Фарҳод Бекмуратов, 79), Муҳаммадкарим Тоиров, Бектемир Абдуманнонов (Армин Бошняк, 90+5), Фарҳод Соҳибжонов (Демир Имери, 79), Лука Згурский (Шахром Самиев, 61).   

Голлар: Ислом Маматказин, 55 – 0:1. Шахром Самиев, 70 – 0:2. Сардор Абдунабиев, 85 – 1:2.

Огоҳлантиришлар: Иван Рогач, 54 – Лука Згурский, 32. Ислом Маматказин, 38. Сардор Азимов, 90+2.