Бутун Италияни шарманда қилди! “Интер” қаттиқ танқидга учраяпти

Европа Чемпионлар лигасининг плей-офф босқичида Норвегиянинг “Будё-Глимт” клубига икки ўйинда ҳам мағлуб бўлиб, мусобақани эрта тарк этган “Интер” кескин танқидларга учради.

Срвуқ ўлкада ўтказилган дастлабки учрашувда 1:3 ҳисобидаги вазиятдан кейин миланликлар ўз майдонида вазиятни ўнглаши кутилган эди. Аммо рақию “Жузеппе Меацца” стадионида ҳам “Интер”ни тиз чўктирди.

Мануэль Аканжининг қўпол хатосидан кейин Йенс-Петтер Хеуге 58-дақиқада ҳисобни очди. 72-дақиқага келиб, Хокон Эвьен мезбонлар дарвозасини қўриқлаган Ян Зоммерни яна ожиз қолдирди.

Қолган дақиқаларда Алессандро Бастони ҳисобдаги фарқни биттага қисқартирган бўлса-да, икки ўйин натижасига кўра, норвегияликлар 5:2 ҳисобида зафар қучди.

Учрашувдан кейин “Интер” сардори Николо Барелла  жамоани оқлашга уринди.

- “Будё-Глимт” иккала ўйинда ҳам ғалаба қозонди, демак улар кейинги босқичга лойиқ. Аслида улар бизга катта муаммо туғдирмади, биз индивидуал хатолар туфайли гол ўтказиб юбордик. Мақсадимиз барча турнирларда курашиш эди, лекин улар яхшироқ ўйнади, - деди Барелла.

Бош мураббий Кристиан Киву эса матбуот анжуманида шундай деди:

“Биз жуда яхши ташкил этилган жамоага қарши ҳамма нарсани синаб кўрдик. Афсуски, бугун биздан кўра анча шиддатли жамоага дуч келдик ва уларни табриклашимиз керак”.

​Италия матбуоти мамлакат футболи инқирозда, деб бонг урмоқда. Амалдаги чемпион “Наполи” Европа Чемпионлар лигасининг умумий босқичдан ўтолмади. “Ювентус” плей-оффнинг  биринчи учрашувида “Галатасарой”дан 2:5 ҳисобида мағлубиятга учраган ва жавоб ўйинидан мўъжиза утяпти.

“Аталанта” биринчи учрашувда Дортмунддан 0:2 ҳисобидаги мағлубият қайтган ва Бергамодаги жавоб ўйинида уларга осон бўлмайди.

Кўпчилик финалга етиб боришини башорат қилган “Интер” футболчилари эса, энди бор эътиборини ички мусобақаларга қаратади.