“Челси” жаҳон чемпионати қаҳрамонларидан бирини олади

“Аякс”нинг ҳужумкор футболчиси Муҳаммад Қудус фаолиятини Англия премьер-лигасида давом эттириши мумкин.

Гана миллий терма жамоаси сафида Қатардаги жаҳон чемпионатида иштирок этаётган 22 ёшли ўйинчи ўзининг энг яхши хислатларини намойиш этиб келмоқда. Муҳаммад Жанубий Корея дарвозасини икки марта ишғол қилиб, жамоасининг 3:2 ҳисобидаги ғалабасини таъминлади.

Муҳаммадни Европанинг бир неча клуби, хусусан “Челси” ўз сафида кўрмоқчи. Ўз мақсадига етиш учун “аристократлар” ПСЖ ва “Ливерпуль” билан куч синашишига тўғри келади.

Қудуснинг “Аякс” билан шартномаси 2025 йилнинг ярмигача давом этади. Жорий мавсумда 14 та учрашувда бешта тўп киритган ҳужумчи 15 миллион еврога баҳоланмоқда.