Ўрозов “Рубин”да Ашурматов йўлини такрорламаслиги керак!

Ўзбекистон миллий терма жамоасининг 22 ёшли марказий ҳимоячиси Жаҳонгир Ўрозов Россия Премьер-лигаси иштирокчиси “Рубин” клубига ўтгани расман эълон қилинди.

Қозон шаҳри клуби бақувват ҳимоячини кейинчалик сотиб олиш ҳуқуқи билан бир мавсумга ижарага олди. Айрим манбаларга кўра, шартноманинг тўлиқ трансфер бўйича банди кучга кириши учун Жаҳонгирдан мавсум давомида янги жамоасининг 50 фоиз ўйинларида қатнашиши талаб этилади.

“Рубин” доимо ўзбек футболи тарбияланувчиларига ишонч билдириб келган. Қозонликлар сафида тўп тепган ҳамюртларимиз орасида юқори натижаларни қайд этганлари ҳам, ўз салоҳиятини тўлиқ очолмаганлари ҳам бор.

Жаҳонгир Ўрозовнинг амплуадошлари – марказий ҳимоячиларни мисол қилсак, “Нефтчи”дан чиққан Андрей Фёдоров “Рубин” жамоаси тарихидан энг кучли ўйинчилардан бири сифатида жой олган. Фёдоров ўз даврида “Рубин” сафида Россия чемпиони бўлган, жамоага сардорлик ҳам қилган.

Ҳозирги авлод Жаҳонгирнинг “Рубин”даги натижаларини бевосита Рустам Ашурматов билан солиштиради. Ҳозир Эроннинг “Истиқлол” жамоаси аъзоси сифатида қайд этилган Ашурматов яқиндагина “Рубин” ўйинчиси эди.      

Ашурматов Қозон клуби сафида 45 та учрашувда қатнашиб, 3 та гол урган. Унинг “Рубин”даги фаолиятини муваффақиятсиз деб бўлмайди, у жамоага премьер-лигага чиқишига ёрдам берди, асосий таркибда ҳам майдонга тушди ва жамоанинг муҳим қисми бўлиб қолди. Бироқ у марказий ҳимояда ҳеч қачон мутлақ биринчи танловга айлана олмади. Хуллас, Рустам бу жамоада Андрей Фёдоров даражасига кўтарила олмади.

Энди 2026 йилги жаҳон чемпионатида Рустам Ашурматов билан бир қаторда Ўзбекистон миллий терма жамоаси шарафини ҳимоя қилган Жаҳонгир Ўрозовдан мухлису мутахассисларимиз Қозон шаҳри клубида Рустам Ашурматовдан ҳам кўпроқ натижага эриша олишини кутишяпти.

Таъкидлаш жоизки, икки йил аввал Жаҳонгир Ўрозовнинг Европадаги фаолияти деярли бошланмасиданоқ якунлангандай кўринган эди. Кутилмаганда Туркиянинг “Эюпсор” жамоаси билан 2023-2024 йилларда ҳамкорлик қилган, бироқ унга жамоа бош мураббийи Арда Турон умуман эътибор қаратмаган. Кейинчалик Самарқанднинг “Динамо” клубига ўтган ёш ҳимоячи Ўзбекистон чемпионатининг энг яхши футболчиларидан бирига айланди, Ўзбекистон миллий терма жамоасигача етиб борди ва жаҳон чемпионати иштирокчиси бўлди.

Бугун эса, Ўрозов жаҳон чемпионати иштирокчиси бўлганидан кейин яна легионер мақомига қайтди. Sport24 сайти маълумотларига кўра, унинг маоши тўрт баравардан ҳам кўпроқ ошади ва ойига тахминан 37,5 минг еврони ташкил этади. Қозон клуби ижара учун 100 минг евро тўлайди, кейинчалик футболчини тўлиқ сотиб олиш учун яна 700 минг евро тўлаши кўзда тутилган.

Агар Ўрозов жамоанинг расмий ўйинларининг камида ярмида иштирок этса, бу банд мажбурий кучга киради. Унинг йиллик маоши 450 минг евро, ойлик ҳисобида эса тахминан 37,5 минг евро бўлади. Самарқандда эса у тахминан 8 минг доллар маош оларди.

Ҳозиргача, Россия Премьер-лигасида бирорта ўзбек футболчиси йўқ эди. Бу мусобақа порлаган охирги ўзбекистонлик футболчи Аббосбек Файзуллаев ҳисобланади. Бироқ у ҳам ўтган ёзда Туркиянинг “Истанбул Башакшеҳир” клубига рекорд суммага трансфер қилинди.

Энди ўзбекистонлик футбол ишқибозлари Жаҳонгир Ўрозов орқали Россия Премьер-лигасида “Рубин” жамоасини қўллаб-қувватлаши кутиляпти.

Элдорга клуб танлашди! Шомуродов шубҳасиз бу жамоага ёрдам бера оларди

Энди у Премьер-лигада ўйнайди! "Динамо" Самарқанд футболчи трансферини эълон қилди

Шомуродовни кутаётган клуб Муҳаммад Салоҳ трансфери бўйича баёнот берди

Машҳур мураббий Шомуродовни танлади

Шомуродов келса, бу жамоа ҳужумини тўхтатиб бўлмай қолади

Тўрт баравар кўп! Ўрозовнинг хориж клубидаги маоши маълум бўлди

Шомуродовни машҳур клубда кўришмоқчи! Элдор ҳар қандай жамоани кучайтиради