“Челси” Марказий Осиёдан рекорд трансферни амалга оширади

Қозоғистоннинг “Қайрат” клуби тарбияланувчиси Дастан Сатпаев Лондоннинг “Челси” клубига кўчиб ўтади. Бу ҳақда Фабрицио Романо хабар тарқатди.

Манбага кўра, “аристократлар” 16 ёшли ҳужумчи учун қозоқ клубига 4 миллион евро ва қўшимча бонуслар тўлаши кўзда тутилган.

Бу сумма Қозоғистон футбол лигаси учун рекорд кўрсаткич ҳисобланади.

Томонлар трансфер бўйича якуний қарорга келганига қарамай, Дастан Сатпаев 18 ёшга тўлгунига қадар ўз юртида тўп тепиб туради. Кейин “Челси” сафига бориб қўшилади.

Лондон клуби истеъдодли ўйинчига беш йиллик шартнома берган. Ўзаро келишувга кўра, ҳамкорлик яна бир йилга узайтирилиши мумкин.

Россиялик журналист ва инсайдер Иван Карпов аввалроқ, “Челси” Сатпаевнинг трансфери учун 4,3 силлион евро тўлаши, бу суммадан 2,4 миллиони белгиланган маблағ, қолгани футболчининг ўйинига қараб бериладиган бонус эканини ёзган эди.

Шу тариқа, Дастан Сатпаев қозоқ футболи учун рекорд трансфер соҳибига айланмоқда.

Эслатиб ўтамиз, яқинда “Манчестер Сити” Марказий Осиё футболининг яна бир вакили – Ўзбекистон миллий терма жамоаси ҳимоячиси Абдуқодир Ҳусанов учун жами 50 миллион евро харажат қилди.