“Челси”га Роналду керак эмас. Лондонликлар бошқа футболчини нишонга олган

"Челси" "Манчестер Юнайтед" ҳужумчиси Криштиану Роналдуни сотиб олмоқчи эмас. “The Athletic” нашри хабарига кўра, “кўклар” бош мураббийи Томас Тухель португалияликни ўз жамоасида кўришни истамаяпти.

Немис мутахассиси Криштианудан кўра 2015 йилдан бери "Манчестер Сити" шарафини ҳимоя қилиб келаётган Рахим Стерлингни афзалроқ кўрмоқда. Манбада қўшимча қилинишича, "Челси" шу ҳафта бошида 27 ёшли англияликнинг трансфери бўйича "шаҳарликлар" билан навбатдаги музокарани ўтказиши керак. Инсайд маълумотларга кўра, Рахимнинг Лондон клуби билан шартнома имзолаш эҳтимоли катта.

Олдинроқ Роналду “Челси”га ўтиши мумкинлиги ҳақида хабарлар тарқалган эди. Футболчининг агенти Хорхе Мендеш яқинда “арситократлар” хўжайини Тодд Боэли билан учрашди, аммо улар Криштианунинг трансфери борасида келиша олмади.