Хабарингиз бўлса, Тожикистон чемпиони “Истиқлол” клуби Тошкентда бир қатор назорат учрашувларини ўтказяпти. Шу йўл орқали улар Осиё Чемпионлар лигасидаги бўлажак ўйинга тайёрланяпти.

Бу клубни Саудия Арабистонида ўтган гуруҳ босқичи ўйинларида нималар қилганини ҳаммамиз кўрдик. Шу боис “Истиқлол”нинг Суперлигамиз жамоаларига қарши ўтказаётган учрашувлари мухлисларни бефарқ қолдирмаяпти. Шунинг учун жамоа бош мураббийи Виталий Левченкога бир қанча саволлар билан мурожаат қилдик.

- Виталий Григорьевич, “Истиқлол” клубининг Тошкентда ўтказаётган йиғинидан кўзланган асосий мақсади нима?

- “Истиқлол” йиғинни Хўжандда ўтказади. Тошкентга эса ўйин куни етиб келади. Бундан кўзланган асосий мақсад жамоага жалб этилиши кўзда тутилган ёш футболчиларнинг ўйин малакасини кўздан кечиришдан иборатдир.

- Тошкентдаги йиғин жамоангизга қандайдир устунлик берадими?

- Тошкентда “Сўғдиёна”га қарши ўйин ўтказдик. Ўша баҳс менга жуда маъқул келди. Боз устига учрашув хусусида шогирдларим билан ҳаммасини таҳлил қилиб чиқишга улгурдим.

- “Металлург” ва “Сўғдиёна”га қарши учрашувларда жамоангизнинг ўйинида қандай камчиликларни кўрдингиз?

- Биз босим остида қоляпмиз. Шу боисдан ўйинимизга бардамлик етишмаяпти. Бунинг боиси шундаки, ўйинларни икки-уч кун оралиғида ўтказишимизга тўғри келмоқда. Шу боисдан ҳам жамоада чарчоқ аломатлари кўзга ташланяпти. Ўзимизнинг камчиликларимиз ҳақида эса гапиришни истамаган бўлардим.

- “Истиқлол” бир қатор янги ўйинчиларни синовдан ўтказяпти. Таркибда Кучеренко ҳам бор экан. Мабодо, у “Насаф” менежери Сергей Кучеренконинг ўғли эмасми?

- Йўқ, Кучеренко сиз айтган инсоннинг ўғли эмас. У Украинанинг “Ингулец” клубидан келган ва унинг амплуаси марказий ҳимоячидир.

- “Истиқлол” таркибида жиддий ўзгаришлар юз бериши мумкинми?

- Ҳа, ўзгаришлар юз бериши тайин. Чунки таркибдаги кўплаб футболчиларда жароҳатлар билан боғлиқ муаммолар юзага келган. Биз имкон қадар таркибга малакали ижрочиларни жалб этиш пайида бўляпмиз.

- Эшитишимча, бошқарувингиздаги жамоага ўзбек футболчиларини ҳам таклиф қилаётган экансиз...

- Ҳозирча аниқ исм-шарифларини айта олмасам-да, марказий ярим ҳимоя ва ҳужумда ўйнайдиган футболчиларни кўздан кечиряпмиз ҳамда улар билан музокаралар давом этяпти.

- Саволни бошқачароқ қўяман: ўзингизга қолса, Ўзбекистон чемпионатида тўп сураётган қайси футболчини “Истиқлол”да кўришни истаган бўлардингиз?

- Ўзимиз кўзлаган, лекин ҳозирда исм-шарифларини ошкор этишни истамаётган футболчилар билан музокаралар олиб бораётганимизни айтмоғим даркор. Агар улар билан шартнома имзолайдиган бўлсак, ҳамма бундан хабар топади.

- “Истиқлол” ОЧЛнинг навбатдаги босқич доирасидаги учрашувларга ҳозирлик кўряпти. Клубнинг мазкур турнирдаги асосий мақсади нималардан иборат?

- Бизнинг минимум вазифамиз 1\8 финалга чиқиш. Максимум вазифа эса орзудаги совринни қўлга киритишдир.

- Сиз учун Ўзбекистондаги энг кучли мураббий ким?

- Бу саволингизга дабдурустдан жавоб қайтариш қийин. Аммо менга “Пахтакор”да ишлаган Шота Арвеладзенинг иш услуби ёққанлигини айтишим мумкин.

- Ўзбекистон чемпионатида ишлаш сизга ёққан бўлармиди?

- Ўзбекистонда футбол учун жуда яхши шарт-шароитлар яратилган. Шу боисдан ҳам клубларингизга қарши учрашувларда иштирок этиш орқали муҳим тайёргарлик босқичини ўтказишни режалаштирганмиз. Умуман айтганда, чемпионатингиз жуда қизиқарли. Унда шунчаки оддий ўйинлар бўлмайди. Ҳар бир беллашув томошабоп руҳда ўтади.

- “Истиқлол”нинг Ўзбекистондаги мухлислари сони сезиларли даражада ошгани сизни хурсанд қиладими? Айниқса, жамоа Осиё Чемпионлар лигасидаги ўйинлари орқали бизнинг мухлисларда яхши таассурот қолдирганди...

- Ҳа, бу мени хурсанд қилади. Жамоамизнинг ўзбекистонлик мухлислари ҳақида илиқ фикрларни айтишим ва улардан миннатдор бўлишим керак. Боз устига Ўзбекистонда бизни худди қадрдонлардек кутиб олишади.

- Сизни Тожикистон терма жамоасини бошқариш учун таклиф қилганлари ҳақидаги гап-сўзлар ростми?

- Бу саволингизга шундай жавоб беришни истаган бўлардим: менинг “Истиқлол” билан тузган шартномам бор ва уни охирига етказишни истайман. Шундай экан,..

- Усмон Тошевнинг Тожикистон терма жамоасида олиб борган ишини қандай баҳолайсиз?

- Ўз ҳамкасбларимнинг ишини муҳокама қилишга одатланмаганман. Яхшиси, бу ҳақда Усмон Тошевнинг ўзидан сўраганингиз маъқулроқ.

- “Истиқолол” энди “Локомотив” билан ўйнайди. Бу рақибни илгари ОЧЛ плей-оффида ютгансизлар. Яна бир ғолиб чиқиш ёқимли бўлса керак-а?

- Ўтган вақт давомида “Локомотив” анча ўзгарди. Қолаверса, клубни энди португалиялик бошқаряпти. Ҳа, шунинг баробарида “Истиқлол” таркибидаги футболчилар асосан ёшларни ташкил этмоқда. Шу сабабдан ҳам бу клуб билан яна рақобатлашиш биз учун жуда қизиқарли бўлади.

- Дарвоқе, Самвел Бабаян “Сўғдиёна”га қарши ўйинни стадионда кузатди. Нима деб ўйлайсиз, у шу орқали “Истиқлол”даги бирор футболчини кўз остига олиб қўймадимикин?

- Ҳа, мен уни трибунада кўрдим. Лекин унинг нима сабабдан ўйинни бевосита трибунадан туриб кузатгани мен учун мавҳум.

- Агар “Истиқлол” Ўзбекистон чемпионатида иштирок этган тақдирда қайси ўринлар учун кураш олиб борган бўларди?

- “Истиқлол” ўз олдига ҳамма вақт юқори вазифаларни қўяди. Ўйлайманки, бу жавобим билан саволингизга жавоб бердим.

- “Истиқлол” ҳозиргача АГМК, “Локомотив” каби етакчиларга қарши ўйнаган. Ўз жамоангизни “Пахтакор”га қарши ўйинда ҳам синаб кўришни истаган бўлармидингиз?

- Ўйин борасида “Пахтакор” билан келишув ўтказмаганмиз. Агар мана шундай имконият юзага келадиган бўлса, “Пахтакор”га қарши бажонидил майдонга тушган бўлардик.