Ҳусанов қаҳрамонлардан бири бўлган учрашув АҚШда рекорд ўрнатди!

Англия Премьер-лигасининг 33-турдан ўрин олган “Манчестер Сити” ва “Арсенал” ўртасидаги учрашув жорий мавсумнинг ҳал қилувчи ўйини сифатида эътироф этилди. 19 апрель куни “Этихад” стадиони мезбонлик қилган бу тўқнашувда 2:1 ҳисобида зафар қучган “шаҳарликлар” яна чемпионлик курашига қайтди.

“Арсенал” ўша мағлубиятдан кейин катта босим остида қолди ва чемпионлик пойгасидаги катта устунликни бой бериб қўйди.

 Устоз ва шогирд – Хосеп Гвардиола ва Микель Артета жамоалари ўртасидаги ўша баҳс энди АҚШ тарихидаги энг кўп томоша қилинган Премьер-лига ўйини сифатида рекорд ўрнатани эълон қилинди.

NBC Sports орқали намойиш этилган учрашувни Америка Қўшма Штатларида 2,6 миллион томошабин кузатган.

19 апрелда бўлган учрашувда Райан Шерки 16-дақиқада мезбонларни олдинга олиб чиққан бўлса, Кай Ҳаверц икки дақиқадан кейин ҳисобни тенглаштирди.

Учрашувнинг кульминацион нуқтаси биринчи бўлим охирига тўғри келди. Босимни кучайтирган “канонирлар” ҳужумчиси Кай Хаверц Жанлуижи Доннарумма қаршисида ёлғиз қолиб зарбага шайлаган пайтда Ҳусанов етиб келиб, тўпни ҳужумчи оёғи устидан қайтариб юборди.

Биринчи бўлим дуранг билан тугаганидан сўнг, Эрлинг Холанд 65-дақиқада гол уриб, “Сити”га чемпионлик пойгасида жуда муҳим уч очко келтирди.

Жорий мавсумдаги “Манчестер Сити” ва “Арсенал”нинг иккинчи ўзаро учрашуви ҳар икки жамоа учун ҳал қилувчи аҳамиятга эга деб баҳоланган эди.

Ўйин аҳамияти томошабинлар сонида ҳам акс этди. NBC, Peacock, Telemundo ва NBC Sports Digital платформаларидаги трансляция ўртача 2,6 миллион аудитория йиғиб, АҚШ тарихидаги энг кўп кўрилган Премьер-лига ўйинига айланди.

NBC Sports маълум қилишича, рекорд кўрсаткич Nielsen Big Data + Panel ҳамда Adobe Analytics рақамлари асосида тасдиқланган.

Сўнгги йилларда ушбу икки клуб ўртасидаги Премьер-лига ўйинлари АҚШ тарихидаги энг кўп кўрилган баҳслар рўйхатининг биринчи икки поғонасини эгаллаб турибди.

19 апрель кунги баҳс янги рекорд сифатида биринчи ўринга қўйилган бўлса, 2024 йил март ойида “Этихад” стадионида бўлиб ўтган ва голсиз дуранг билан якунланган учрашув аудитория тўплаш (2,6 миллион нафарга яқин томошабин жамлаган) бўйича иккинчи поғонага тушиб қолди.

Ўтган йил август ойида “Олд Траффорд”да ўтган “Манчестер Юнайтед” ва “Арсенал” ўртасидаги баҳс 2,5 миллион томошабин билан учинчи ўринда қайд этилган.

2023 йил январда “Эмирейтс” стадионидаги “Арсенал” ҳамда “Манчестер Юнайтед” учрашувини 2,3 миллион аудитория томоша қилган ва бу тўртинчи кўрсаткич сифатида тан олинди.

2023 йилнинг декабрь ойидаги “Ливерпуль” – “Арсенал” учрашуви ҳам 2,3 миллионга яқин томошабин билан кучли бешликни якунланди.

“Арсенал” жорий мавсумда Европа Чемпионлар лигаси ғолиблиги учун асосий даъвогарлардан ҳисобланади. Микель Артета шогирдлари қитъанинг энг нуфузли мусобақаси ярим финалида Мадриднинг “Атлетико” клуби билан рақобатлашади.

Шунингдек, “канонирлар” узоқ танаффусдан кейин яна Англия чемпионлигига эришишни орзу қилмоқда.

Бу мавсум илк соврини – Англия лигаси кубогини қўлга киритиб бўлган “Манчестер Сити” эса, Чемпионлар лигасидан эрта чиқиб кетган ва бор эътиборини ички треблга қаратади. Бунинг учун Хосеп Гвардиола шогирдлари Англия Премьер-лигасида қолган бешта учрашувни ўз фойдасига ҳал қилиши ва 16 май куни Англия кубоги финалида “Челси”ни мағлубиятга учратиши талаб этилади.

Таъкидлаш жоизки, бу мавсум Абдуқодир Ҳусанов “Манчестер Сити” ҳимоя чизиғининг етакчи ўйинчисига айланган. 22 ёшли легионеримиз барча турнирларда 33 маротаба майдонга тушди ва жамоаси муваффақиятларига катта ҳисса қўшмоқда.

Абдуқодир жамоа сафида илк ютуғи – Англия лигаси кубогини қўлга киритиш баробарида январь ва март ойларида “Манчестер Сити”нинг энг яхши ўйинчиси сифатида эътироф этилди ва бир жуфт индивидуал совринга ҳам эга бўлди.

Агуэро Ҳусановдан сюрприз кутмоқда!

Шацких: Ҳусановни бу футболчи билан солиштирманг!

У мени ютади! Машҳур ҳужумчи Ҳусановнинг зўрлигини тан олди

“Сити”ни биринчи ўринга кўтаришга ҳисса қўшган Ҳусановнинг ўйини қандай баҳоланди?

Шомуродовдан қолган жойни Муҳаммад Салоҳ эгаллайди