Чемпионлар лигаси плей-оффига битта йўлланма қолди, “Барса” Мессисиз “синди”

Чемпионлар лигасининг гуруҳ босқичи беллашувлари якунланди. Плей-оффнинг 16 та йўлланмасидан 15тасининг эгаси аниқланди.

Гуруҳдаги олтинчи турнинг иккинчи кунги баҳсларидан сўнг, «Манчестер Сити», «Пари Сен-Жермен», «Ливерпуль», «Атлетико», «Аякс», «Спортинг», «Реал», «Интер», «Бавария», «Бенфика», «Манчестер Юнайтед», «Лилль», «Зальцбург», «Ювентус» ва «Челси» бош соврин учун курашни давом эттирадиган бўлди.

Эътиборли жиҳати, Лионель Мессисиз ўйнаётган “Барселона” охирги 20 йилда илк бор гуруҳ босқичидан ўта олмади ва Европа Лигасида ўйнайдиган бўлди.

Плей-оффнинг сўнгги йўлланмаси эгаси “Аталанта” ва “Вильярреал” ўртасидаги учрашувида аниқланади. Бергамо шаҳри мезбонлик қилиши керак бўлган бу баҳс об-ҳаво шароити туфайли бир кун ортга  сурилди.

F гуруҳида ўйнаётган мазкур жамоалар беллашувида испан клубини дуранг натижа ҳам қониқтиради. Рақибдан бир очкога ортда қолаётган бергамоликлар плей-оффга чиқиши учун ўз уйида ғалаба қозониши шарт.