Чемпионликни қўлдан чиқарган “Арсенал” 10 нафар футболчидан воз кечди

“Арсенал” якунланган мавсумда Англия чемпионлигига яқин келганди.

Премьер-лиганинг аксарият қисмида пешқадамлик қилган Микель Артета шогирдлари ҳал қилувчи паллада “Манчестер Сити”ни олдинга ўтказиб юборди.

“Арсенал” раҳбарияти жамоага керак бўлмай қолган ўн нафар футболчи билан хайрлашди. Хусусан, ўз даврида асосий таркиб ўйинчиси бўлган Эйнсли Мейтленд-Найлзга чиқиш эшиклари кўрсатилди. 25 ёшли футболчи мавсумни ижара асосида “Саутгемптон”да ўтказган эди.

Шунингдек, яна тўққиз нафар ўйинчи – Зак Аве, Жоэл Идехо, Жорж Льюис, Мэтт Смит, Том Смит, Калил Грин, Александр Ковачевич, Тино Квамина, Матеус Робертс 30 июнь куни шартномаси якунланиши билан эркин агентга айланади.