Даврон Файзиев: "Ёмон ўйнадик, аммо натижага эришдик"

“Бухоро” клуби мавсумни яхши бошлади ва кетма-кет иккита ғалабага эришди. Ғузорда “Шўртан” меҳмони бўлган “Бухоро” қимматли уч очкони қўлга киритди. Ўйиндан кейин “Бухоро” бош мураббийи Даврон Файзиев таассуротлари билан ўртоқлашди.  

- Биринчи турда “Оқ-тепа” ва бугунги рақибимиз – “Шўртан” раҳбариятига бизга аъло даражадаги сифатли стадион ҳамда шароитлар яратиб берилгани учун ташаккур билдираман. “Оқ-тепа” билан учрашувдан кейин ҳам миннатдорчилигимни билдирмоқчи эдим, афсуски, ўша куни матбуот анжумани ўтказилмади.

Бугунги ўйинга қисқача тўхталадиган бўлсам, ёмон ўйнадик, аммо натижага эришдик. Асрор Алиқулов ёшлардан иборат яхши, интизомли жамоа шакллантирган. Мураббийнинг имзоси кўриниб турибди. Тўғриси, менда ҳайиқиш бор эди, ўйингача. Чунки бу ёшлар болалигидан бирга катта бўлишган. Бир сўз билан айтганда, улар майдонда бир-бирларини қарамасдан туриб ҳам сеза оладилар. Улар ўз устиларида ишлашдан тўхтамаса, келажакда кучли футболчилар бўлиб етишишига ишонаман. Бу – футбол, кимдир ютади, кимдир ютқазади. Тўғри, бизнинг сафимизда тажрибали ўйинчилар тўп суришяпти. Олдимизда турган масъулиятни яхши ҳис қилиб турибмиз. Бугунги ғалаба билан бухоролик мухлисларни ва раҳбарларни табриклайман.

Йигитларга доим бундай ўйин билан натижага эришиш қийин деб таъкидлаб келаман. Балки улар натижага осонликча эришамиз, деб ўйлаши мумкин. Аммо шуни унутмаслик керакки, майдонда шундоқ юриб футбол ўйнаб бўлмайди. Ҳаётнинг ўзи ҳаракатдан иборат. Яшаш учун курашиш керак, майдонда ҳам шу, - дейди Файзиев.