Де Брюйне Осиё клубига ўтишга қарши эмас

"Манчестер Сити" ярим ҳимоячиси Кевин Де Брюйне фаолиятини Саудия Арабистонида давом эттириши мумкин. Бу ҳақда "Foot Mercato" нашри хабар бермоқда.

Манбанинг маълум қилишича, Саудия Арабистони иккинчи дивизионидаги "Неом" клуби Де Брюйне билан шартнома имзолаш бўйича жиддий музокаралар олиб бормоқда. 33 ёшли белгиялик футболчининг ўзи Яқин Шарққа кўчиб ўтишга қарши эмас экан.

Де Брюйне 2015 йилдан бери "Манчестер Сити"да тўп тепиб келмоқда. Ёзда ярим ҳимоячининг "шаҳарликлар" билан тузилган шартномаси тугайди.

Маълумот учун, 26-тур якунига кўра, "Неом" Саудия Арабистони иккинчи лигасида 57 очко тўплаб, пешқадамлик қилмоқда.