Де Йонг МЮга ўтиш вариантини ортга ташланган қадам деб ҳисобламоқда

"Барселона" юлдузи Френки де Йонгнинг Англияга кўчиб ўтиши жуда кўп муҳокама қилинмоқда.

"The Athletic" нашри тарқатган хабарга кўра, футболчи "Манчестер Юнайтед"га ўтиш бу - ортга ташланган қадам бўлади деб ҳисобламоқда. Боиси, "қизил иблислар" ўтган мавсум АПЛда 6-ўринни эгаллади ва Чемпионлар лигасига чиқа олмади.

Бироқ манчестерликлар учун ҳам бир нечта ижобий ҳолатлар мавжуд. Биринчидан, МЮ "Барселона"га айни пайтда жуда зарур бўлган катта суммани тўлашга қодир. Каталонияликлар кетма-кет трансферларни амалга оширгани учун молиявий ҳолати у қадар яхши эмас.

Бундан ташқари, Манчестерга Френкининг "Аякс"даги устози Эрик тен Ҳаг бош мураббий сифатида келди. Бу ҳам нидерландиялик истеъдод соҳибининг танловига таъсир кўрсатиши мумкин.

25 ёшли ярим ҳимоячи "кўк-анорранглилар" сафига 2020 йилда айнан "Аякс"дан келиб қўшилганди.