Дешам Парагвай терма жамоаси ўйин услубини қоидасиз жангларга қиёслади

Жаҳон чемпионати 1/8 финал босқичида Парагвайга қарши ўйинда Жанубий Америка жамоасининг услуби футболдан кўра кўпроқ қоидасиз жанглар, яъни рестлингни эслатди. Бу ҳақда Франция терма жамоаси бош мураббийи Дидье Дешам учрашувдан сўнг Халқаро футбол федерацияси матбуот хизматига берган интервьюсида айтиб ўтди.

Франция терма жамоаси якшанбага ўтар кечаси Парагвайни 1:0 ҳисобида мағлуб этиб, жаҳон чемпионати чорак финалига йўл олди. Беллашув давомида парагвайлик ҳимоячи Матиас Гиларса камида икки марта француз футболчиларини қўпол равишда уриб юборди, шунга қарамай, ўзбекистонлик ҳакам Ильгиз Танташев унга бирорта ҳам огоҳлантириш карточкасини кўрсатмади.

- Бугун кўрганларимизни футбол, деб аташг жуда қийин. Бу кўпроқ жангга ўхшаб кетди, футбол учрашувига эмас, – деди Дешам. – Майдонда жуда кўп куч ишлатиш, тўхташлар, майда жанжаллар бўлди. Бундай шароитда ўйин ритмини топиш ёки сифатли футбол кўрсатиш осон эмас. Жамоангизни тўпни тез ҳаракатлантиришга, ҳужумлар яратишга тайёрлайсиз, аммо ўйин доимий тўқнашув ва танаффусларга айланиб қолса, ҳаммаси ўзгаради. Бу ҳақиқий футбол ўйнашни истайдиган футболчилар учун жуда қийин.

- Кейин эса одамлар жанубий америкалик футболчилар, Лионель Месси ва унинг ажойиб гол сериялари ҳақида гапиришади. Баъзан ўйлаб қоласиз: бундай муҳитда у қандай қилиб шунча гол уришга эришяпти? Агар ҳар бир ўйин шунчалик кескин ва тартибсиз ўтадиган бўлса, унинг натижалари янада ҳайратланарли кўринади. Лекин умуман олганда, футбол бундан яхшироқ бўлишга муносиб ўйин, деб ўйлайман. Томошабинлар доимий жанжал эмас, сифатли ўйин кўришга лойиқ, – дея қўшимча қилди Франция бош мураббийи.

Франция терма жамоаси устозининг айтишича, ўйн вақтидаги кучли иссиқ ҳам футболчилар ҳаракатига жиддий таъсир кўрсатган. 

- Жанубий Америка жамоаларига қарши ўйнаш ҳар доим оғир кечади. Албатта, охирги икки вазиятда имкониятларимизни голга айлантира олганимизда, ўйин биз учун анча енгил бўларди. Парагвай эса майдонда турли усулларни синаб кўрди. 

Балки сабаб фақат шунда эмасдир. Биз диққатни йўқотмадик, аммо ўйиннинг жисмоний томони ҳаммасини қийинлаштирди, парагвайликлар эса асосий эътиборни ҳимояга қаратди. Ростини айтсам, иссиқ ўйин шиддатини босиб қўйди. Шунга қарамай, улар шиддатни оширмасдан ҳам яхши ҳимоя қила олишди, – дея таъкидлади Дешам.

Чорак финалда Франция Марокаш терма жамоасига қарши майдонга тушади. Марокаш аввалроқ Канада устидан йирик 3:0 ҳисобида ғалаба қозонган. Беллашув 9 июль куни бўлиб ўтади. АҚШ, Канада ва Мексика ҳудудида ўтаётган жаҳон чемпионати 19 июл куни якунланади. Турнирнинг амалдаги чемпиони – Аргентина терма жамоаси.