"Динамо" - "Локомотив": Ўзаро ўйинларда устунлик ким томонида?

Бугун Ўзбекистон Кубоги гуруҳ босқичининг сўнгги турида "Динамо" Самарқандда "Локомотив"ни қабул қилади.

Хабарингиз бор, иккала жамоа про лигада кураш олиб боришяпти ва ҳозирда чемпионат етакчилари саналадилар. Эндиликда улар Кубок доирасида яна беллашадилар. "Динамо" ҳам, "Локомотив" ҳам муддатидан илгари кейинги босқич масаласини ижобий ҳал қилишган. Фақат бугун 1-ўрин эгасини аниқлаштириб оладилар.

"Динамо" матбуот хизмати эса бугунги ўйин олдидан превьюни тақдим этди ва унда шундай дейилади:

«Динамо» ва «Локомотив» чемпионат тарихида ўзаро 29 марта тўқнаш келган. «Динамо» 12 ўйинда ғолиб бўлган, 5 ўйин дуранг ҳисобида якунланган. «Локомотив» «Динамо»ни ҳозирга қадар 12 марта мағлуб эта олган. Тўплар нисбати «Локо» томонида – 40:42. Ўзаро ўйинларда «Динамо» 41, «Локомотив» ҳам 41 очкони қўлга киритган.

«Локомотив»нинг ўзаро ўйинларда қозонган энг йирик ғалабаси – 5:1 га тенг. «Динамо»да бу кўрсаткич янада каттароқ – 5:0. 2009 йилги баҳсда Азамат Абдураимов бошчилигидаги «Динамо» Илҳом Юнусов, Дэвид Ония, Андрей Акопянц, Эркин Бойдуллаев, Баҳодир Насимовнинг Филимонов дарвозасига киритган голлари эвазига «Локо»ни 5:0 ҳисобида мағлуб этган.

«Динамо» сўнгги марта 2022 йилда «Локомотив»ни Самарқандда мағлуб этган – 3:1. Тошкентда эса бу йил 0:0 ҳисоби қайд этилган".