"Динамо" менинг охирги клубим" - собиқ жамоасига қайтган 38 ёшли футболчи яна нималарни айтди?

Самарқанднинг “Динамо” клуби иккинчи давра учун таркибини кучайтиришда давом этяпти. Кўпни кўрган тажрибали ўйинчилар билан келишувларга эришиляпти. Марат Бикмаев, Шоҳруҳ Маҳмудҳожиев ва Эркин Бойдуллаев “Динамо” билан шартнома имзолади. Айниқса, уларнинг орасида Бойдуллаевни алоҳида кўрсатиш мумкин. Зеро, у самарқандлик бўлиб, бир неча йилдан кейин яна собиқ жамоасига қайтди. Эркин ушбу қайтишини Sports.uz мухбирига шундай деди:

"Самарқандлик мухлисларнинг мени бундай даражада кутиб олишини тўғриси, кутмагандим. Кўпчилик инстаграмда ёзди ва қўнғироқ қилди. Улар клубга қайтганимдан хурсанд бўлишганини айтди. Олдинлари “Насаф” ёки “Қизилқум” таркибида “Динамо”га қарши ўйнаганимда самарқандлик мухлислар трибунадан “қайт ўзингнинг юртингга”, деган гапларни айтишарди. Яхши кутиб олишганига ва менга ишонишгани учун “Динамо” ишқибозларига катта раҳмат".

Бу футболчи 38 ёшни қаршиламоқда. Суперлигада бундай ёшда тўп суриш қанчалик машаққатлигини айтишга ҳожат йўқ. Шуни ҳисобга олсак, Эркин ҳозирда элитамиздаги “қария” футболчилардан бирига айланган. Аммо шунга қарамасдан, ярим ҳимоячи ҳамон яхши спорт формасида ўйнай олаётганини кўрсатиб келмоқда. Қандай қилиб бу ёшгача бемалол ўйнаш мумкин? Жисмоний тарафдан қийинчилик сезмаяптими? Қуйида футболчи ўз фикрини билдирди.

"Октябрь ойида 38 га кираман. Лекин қийинчилик сезганим йўқ. Таниқли ёзувчи Дэйл Корнегининг шундай гапи бор: “уринманг, бу тузоқ”, деган. Спортда осони йўқ. Тўғри, бу ёшгача ўйнашимга, биринчи навбатда, ҳар томонлама режимга қатъий амал қилаётганимни айтишим мумкин. Оғир, ёғли овқат, ширинликлардан ва газли сувлардан воз кечаман. Машғулотларда максимал даражада ишлайман. Жамоага 2-3 кун дам берилса, бир кун хордиқ чиқариб, кейин ўзим машғулот қиламан, тренажёр залида ишлайман".

Эркин “Динамо” билан 1,5 йиллик шартнома имзолади. Бундан чиқди, бу клуб унинг футболчилик фаолиятида охирги жамоаси бўлиб қоладими?

"2010 йили кетганимдан бери “Динамо” шу йил илк бор таклиф билан чиқди (кулади). Очиғи, “Динамо” менинг охирги клубим бўлади", - дея жавоб берди футболчи.

Бунга қадар ярим ҳимоячи Навоийнинг “Қизилқум” жамоасида ҳам самарали фаолият олиб борди. Аммо нима учун у ердан кетгани бироз ажабланарли ҳам туюлди. Шунинг учун ундан нега “Қизилқум”ни тарк этишинниг сабабини билишга қизиқдик.

“Қизилқум”да ҳеч қанақа муаммо йўқ эди. У ерда ўзимни жуда яхши ҳис қилардим. “Динамо” клубидан таклиф бўлганидан хурсанд бўлдим. Ўзимни шаҳримга қайтгим келганди. Агар “Динамо” олдинги йиллари таклиф қилганда ўша пайтларда қайтган бўлардим. Ҳамма қариндошларим ҳам Самарқандда".

Самарқандликлар биринчи даврада натижалари кутилганидек бўлмади. Кўплаб очколар бой берилди. Шунинг учун ҳам ёзги селекцияда таркиб кучайтирилмоқда. Бойдуллаев жамоасининг биринчи даврадаги иштироки ҳақида шундай деди:

“Динамо”ни доим кузатиб келганман. Биринчи даврада ёмон ўйнамади. Фақат омад умуман келмади. “Бунёдкор” устидан ғалаба қозониб турган чоғида “Динамо” футболчиси қизил карточка олди. “Металлург” билан учрашувда эса ютаётган пайтида 91 ва 94-дақиқаларда гол ўтказиб аламли мағлубиятга учради. АГМК ва “Навбаҳор”га қарши ўйинларда ҳам охирги сонияларда гол ўтказиб юборди. Қисқа қилиб айтганда, бир қатор учрашувларда аламли тарзда ютқазди. Бу йил осон ўйинларнинг ўзи йўқ. Насиб қилса, Суперлигада қолиш учун боримизни берамиз. Яхши жамоа бор, ёш иқтидорли футболчилар кучга тўлган".