"Динамо" Россия, Арманистон ва Қозоғистон чемпионларига қарши ўйин ўтказади

Суперлига-2026га якуний тайёргарлик босқичини Бирлашган Араб Амирликларида ўтказадиган "Динамо" жамоаси бир қатор номдор клубларга қарши майдонга тушади. 

Самарқанд кеча Россиянинг 10 карра чемпиони "Зенит" билан ўртоқлик ўйини борасида келишувга эришгани ҳақида хабар берилган эди. Санкт-Петербург клуби билан 9 феврал кунги баҳс йиғиндаги 1-ўйин бўлади, Абу-Даби ва Дубайда жамоани яна 4та учрашув кутиб турибди. 

Хусусан, 12 феврал куни 13 карра Арманистон чемпиони "Пюник" билан баҳс ўтказилса, 14 февралда Россиянинг 3 карра чемпиони "Локомотив" Москвага қарши майдонга тушилади. Яна икки кун ўтиб – 16 февралда эса Қозоғистоннинг 7 карра чемпиони "Астана" клуби "Динамо"га қарши ўйин ўтказади. 19 февралда эса 2025 йил Қозоғистон Премьер-лигасида 4-ўринни эгаллаган "Елимай" клуби кўҳна шаҳар жамоасининг Дубай йиғинидаги сўнгги рақибига айланади. 

Ушбу баҳсдан кейин "Динамо" Ўзбекистонга қайтиб, Самарқандда ўтадиган Суперлига 1-тури доирасидаги "Навбаҳор"га қарши ўйинга ҳозирлик кўради.