"Динамо"га ҳавас қилиб бўлмайди!

Бугун Суперлиганинг навбатдаги тур доирасида "Насаф" ҳамда "Динамо" иштирокидаги ўйин бўлиб ўтади. Суперлигани тарк этиб улгурган самарқандликларга ҳавас қилиб бўлмайди. "Насаф" эса Кубокни қўлга киритгач, янада юқори кайфиятда ва энди чемпионлик йўлида ҳам яхшигина имкониятни ҳосил қилган.

Ўзбекистон чемпионатлари тарихида «Динамо» ва «Насаф» клублари шу кунгача ўзаро 41 марта ўзаро тўқнаш келган. Ўйинларнинг 8 тасида Самарқанд клубининг қўли баланд келган бўлса, 21 ўйинда Қарши жамоаси устун келган. 12 баҳсда эса томонлар муроса кўчасини танлаган.

«Насаф»нинг «Динамо» устидан энг йирик ғалабаси 5:0 бўлса, «Динамо»нинг «Насаф» устидан энг йирик ҳисобли ғалабаси 4:0.

Ўзаро ўйинларда қаршиликлар 61 та гол, кўҳна шаҳарликлар 38 та гол киритган. Бугунги Қаршидаги баҳс ўзаро ўйинлар тарихида 42-учрашув сифатида қайд этилади.

Эслатиб ўтамиз, "Насаф" - "Динамо" беллашуви бугун Қаршидаги "Марказий" стадионда соат 18:30 да бошланади.