Dragan Cheran: "Nasaf"ning kelajagi meni unchalik xavotirga solmaydi

Amaldagi chempion – “Paxtakor” bu yilgi mavsumni ham karvonboshi sifatida o‘tkazmoqda. Shota Arveladze jamoasi 11-turda “Nasaf”ni yirik 4:1 hisobida mag‘lub etdi. Ushbu o‘yinda esa “Paxtakor”ning to‘purari Dragan Cheran yana katta sahnaga chiqdi va qarshiliklar darvozasiga uchta gol urdi. Uning sobiq jamoasiga qarshi bahsda xet-trikka erishgani e’tiborimizni tortdi. Shu sababli Cheranga “Nasaf”ga taalluqli ayrim savollar bilan murojaat qildik.

- Dragan, sobiq jamoangiz darvozasiga uchta gol urish asosiy maqsadingizmidi?

- Sizga rostini aytsam, ushbu o‘yinda gollar haqida unchalik o‘ylamagandim. Maydonda hammasi o‘z-o‘zidan yuz beradi.

- Bugungi “Nasaf” haqida nima degan bo‘lardingiz? Ular “Paxtakor”ga jiddiy qarshilik ko‘rsatishga qiynalishdi, shundaymi?

- Umuman aytganda, “Nasaf”ga qarshi juda keskin o‘yin bo‘ldi. Biz esa kerakli paytlarda gollar ura oldik. Garchi yirik hisobda yutgan bo‘lsak-da, raqibimiz ham bizga munosib qarshilik ko‘rsatdi va yaxshi harakat qildi, deyishim mumkin.

- Vaqti kelib yana “Nasaf”ga yordam berish uchun qaytasizmi yoki bu imkonsizmi?

- Kelajakda nima bo‘lishini ayta olmayman. Lekin o‘zingiz ham yaxshi bilasizki, hayotda hamma narsa bo‘lishi mumkin.

- Siz “Nasaf” bosh murabbiyi Ro‘ziqul Berdiev bilan yaxshi aloqadasiz. Ayting-chi, “Nasaf”ni yanada yaxshilash uchun unga qanday maslahat bergan bo‘lardingiz?

- Maslahat deysizmi? Men unga emas, u menga maslahat berishi kerak deb o‘ylayman. Aslida Ro‘ziqul Berdiev nima qilish kerakligini juda yaxshi biladi. Shu sababli “Nasaf”ning kelajagi meni unchalik xavotirga solmaydi.

- Sizningcha, sobiq jamoangiz bunday holatda qaysi o‘rin uchun kurasha oladi deb o‘ylaysiz?

- Bu borada shuni aytishim mumkinki, ular hamisha top-klub va aynan yuqori o‘rinlarda bo‘lishga haqlidirlar.

- Qiziq, siz uchun kim kuchli: Arveladzemi yoki Berdiev?

- Bunday savollarni yoqtirmayman. Shu bois bu kabi savollar bermang.

- Bu yil yana boshqa hujumchilardan katta farq bilan to‘purarlar orasida etakchi bo‘lib turibsiz. O‘zbekiston chempionatida sizga raqobat tug‘diradigan kuchli hujumchi yo‘q, deb o‘ylaysizmi?

- Jamoadoshlarimga katta rahmat, bu yil ham men yaxshi holatdaman. “Paxtakor”ning har bir hujumchisi hozirda yaxshi kayfiyatda va yuqori sport formasida. O‘zingning jamoangda shunchalik xavfli hujumchilarga ega bo‘lish aslida bu juda yaxshi holat.

- Karantindan keyin Superliganing saviyasiga ta’sir qilyapti, deb o‘ylaysizmi?

- Albatta, lekin birgina bu erda emas, hamma joyda shunday. Ushbu vaziyat esa butun dunyodagi “global” holat.