Драган Черан Суперлигада кетма-кет 6 марта мавсум тўпурарига айланди

Хабарингиз бор Ўзбекистон Суперлигасида яна бир мавсум ўз якунига етди. Унда "Насаф" чемпионликни қўлга киритган бўлса, ОКМК иккинчи ўрин эгасига айланди. "Навбаҳор" эса 3-поғонани эгаллади. 

Мавсум тўпурарлиги "Пахтакор" ҳужумчиси Драган Черанга насиб этди. У 13 та гол билан бу борада биринчи ўринни қўлга киритди. Кейинги ўринда "Сўғдиёна" вакили Люпче Дориев бўлди (12 та гол). Шунингдек, Тома Табатадзе ва Анвар Хожимирзаев ҳисобида 10 та гол мавжуд. 

Шу тариқа, Черан Ўзбекистон чемпионатининг 6 карра тўпурарига айланди. 2018 йили "Пахтакор" футболчиси Исмоил Гонсалвеш тўпурар бўлган (12 та гол). Шундан бери Драган бу ўринни ҳеч кимга бермай келмоқда. 

Сербиялик легионер кетма-кет олти яъни 2019, 2020, 2021, 2022, 2023 ва 2024 йилги мавсумларнинг барчасида бу борада етакчиликни қўлга олиб келмоқда. Унинг энг сермаҳсул мавсуми 2019 йилга тўғри келади (23 та гол). 

Шундай бўлсада, 37 ёшли страйкер йил якунида "шерлар" сафини тарк этиш эҳтимоли йўқ эмас. У мазкур мавсум Суперлигада 22 та ўйинда майдонга тушди. Сўнгги турларда эса учрашув қайдномасидан чиқариб юборилди. Қизиқарлиси, бу воқеа Максим Шатцкихнинг қайтганидан кейин содир бўлди.