ЕЧЛда бир-бирига мос жуфтликлар. Бугун “Барселона” – “Ливерпуль” ўйини бўлади

Европа чемпионлар лигасида 30 апрель – 1 май кунлари ярим финалнинг илк учрашувлари ўтказилади. Унда дастлаб “Тоттенхэм” Англияда “Аякс”ни қабул қилса, “Барселона” Каталонияда “Ливерпуль” билан куч синашади.

Бу жамоаларнинг шу босқичга муносиб ёки йўқлиги бошқа масала. Лекин рақиблар бир-бири учун мос. Чунки лондонликлар ва амстердамликлар ҳар қандай жамоага қарши ҳужумкор ўйнашдан қўрқмайдиганлар сирасидан эканлигини исботлашмоқда. Каталонияликлар ва Клопп шогирдлари борасида эса тўхталиб ўтиришнинг ҳожати йўқ. Ушбу қарама-қаршиликни айрим инсонлар йил ўйини бўлиши мумкинлигини айтишмоқда. Хаттоки, мазкур жуфтлик ғолиби ЕЧЛ бош совринини қўлга киритишини ишонч билан таъкидлашмоқда. Аммо улар “Тоттенхэм” драмматик беллашувда “Манчестер Сити”ни ортда қолдирганини, “Аякс” мусобақа фавориятларидан иккитасини – “Реал” ва “Ювентус”ни чиқариб юборганини унитишган кўринади.

Шуниси аниқки, кимлар финалга чиқишини ҳеч ким олдиндан айта олмайди. Мессиси бор “Барселона” бош соврин учун курашда бироз фаворитдир. Лекин “Тентак Клопп” бунга жимгина қараб турмайди.

“Аякс” шунча грандларни ортда қолдириб, “Тоттенхэм” тўсиғига келиб таслим бўлишни истамаслиги аниқ. Почеттино шогирдларида ҳам шу ҳолат. Уларни бир қадам финалдан ажратиб турибди. Шунинг учун барча борини беради. Учрашувларда кимнинг имкониятлари юқорироқ эканлигини эса очиғи, айтиш жуда қийин.

Бугун Каталонияда бўладиган учрашув Тошкент вақти билан 00:00да бошланади.

1/2 финал. Биринчи ўйинлар

30 апрель. “Тоттенхэм” – “Аякс” 0:1

1 май. “Барселона” – “Ливерпуль”

Ярим финал. Жавоб ўйинлари

7 апрель. “Ливерпуль” – “Барселона”

8 апрель. “Аякс” – “Тоттенхэм”