Энди спорт мактабларида коронавирусга чалинган беморлар даволанади

Барчага яхши маълум, айни дамда юртимизда коронавирус билан боғлиқ вазият ҳамон мураккаблигича қолмоқда. Ўзбекистон Республикаси Жисмоний тарбия ва спорт вазирлиги матбуот хизмати тарқатган хабарга кўра, республика ҳудудидаги йирик спорт иншоотларида беморларни қабул қилиш учун махсус жойлар ташкил этилмоқда.

“Республика бўйича катта сиғимли спорт залларни коронавирусга чалинган беморларни даволаш масканига айлантириш бўйича барча шаҳар, туманлар спорт таълим муассасалари раҳбарларига тегишли топшириқлар берилиб, керакли ишлар амалга оширилмоқда.

Жумладан, Қорақалпоғистон Республикасидаги Нукус ихтисослаштирилган олимпия захиралари мактаб-интернати, Олимпия ва миллий спорт турлари бўйича Нукус олий спорт маҳорати мактаби, Республика ўйин турлари ва енгил атлетика бўйича ихтисослаштирилган болалар ва ўсмирлар спорт мактаби ҳамда Нукус ва Караузак туманлари болалар ва ўсмирлар мактабларининг 12 та спорт залларида 1125 ўринли койкаларни жойлаштириш бўйича ишлар амалга оширилмоқда.

Маълумот ўрнида таъкидлаш лозим, мазкур мажмуаларга 3-август кунидан бошлаб беморларни қабул қилиш режалаштирилган”, - дейилади вазирлик хабарида.