"ENG ZO‘R Uz Football Awards-2022". Ўзбекистонда йилнинг энг яхшилари аниқланди. Барча натижалар билан танишинг

Бугун ЎФА ҳамда ЎзПФЛ футболимизда йилнинг энг яхшиларини аниқлаш маросимини ўтказмоқда.

Ушбу тадбирда йилнинг энг яхши футболчиси, йилнинг энг яхши футзалчиси, йилнинг энг яхши мураббийи ва шунга ўхшаш бошқа номинацияларда ғолиблар аниқланади. Қуйида жараёндан матнли трансляция эътиборингизга ҳавола этилади.

Даврон Файзиев ҳамда Лайло Рустамов тадбирни бошловчи сифатида олиб боради. Биринчи бўлиб саҳнага Тўлаган Исоқов таклиф этилди.

Биродар Абдураимов - ўзбек футболи нуронийси совринини қабул қилиб олди.

Қарийб 35 йилдан бери Фарғона футболида суҳандонлик қилаётган Анвар Охунов - фидойилик рамзи соврини ғолиби деб топилди.

Йилнинг энг яхши ҳаками совринини топшириш учун Жаҳон чемпионатлари рекордчиси, ЎФА 1-вице-президенти Равшан Эрматов саҳнага таклиф этилди. Вадим Агишев ҳамда Розиябону Юсупова!

Фаолияти мобайнида расмий ўйинларда бирорта қизил карточка олмаган Одил Аҳмедов фэйр-плей совринини топшириш учун саҳнага кўтарилди. "Хоразм" футбол клуби!

Бутун йил давомида энг кам бюджет айнан Хоразм футбол клубида эди. Суперлиганинг айрим жамоалари Хоразм клубининг сметасидан 20 баробар кўпига эга. Шунга қарамай, хоразмлик футболчилар ҳақиқий ирода кўрсатди. Йигитлар бир неча ой маош олмаган ҳолатида ҳам ғурур ва номусидан воз кечмади. Улар ўз ота-онаси, оиласи ва мухлислари учун охиригача жанг қилди. Ўта кам смета билан Про лиганинг тўртинчи жамоаси бўлиш таҳсинга сазовор.

Йилнинг энг яхши ёшлар мураббийи - Ўзбекистон U19 терма жамоаси бош мураббийи Фарҳод Нишонов!

Унинг шогирдлари Саудияда ўтган U20 Осиё чемпионат саралашида Малдив, Мянма, Саудия, Хитой ёшларини таслим қилди.
Шу йилнинг ўзида вакилларимиз Япониядаги халқаро турнирда ғолиб чиқди. Эътиборлиси, ёшларимиз бу мусобақада уругвайлик тенгқурларини мағлуб этишди. Финалда эса мезбон Япония пеналтилар сериясига кўра таслим этилди. Бир мавсумнинг ўзида Саудия, Хитой, Япония, Уругвай каби термаларни мағлуб этиш ўта ёқимли ҳолат.

"Ёш юлдуз" номинацияси ғолибини аниқлаш учун Миржалол Қосимов саҳнага таклиф этилди. Аббосбек Файзуллаев!

Файзуллаев учун жорий мавсум омадли ва сермаҳсул бўлди. У Пахтакор сафида Ўзбекистон чемпионлигини қўлга киритди. Суперлига-2022 мавсумида 21 ўйинда майдонга тушиб 5 гол ва 2 та голли узатмани амалга оширди.

Навбат футзалга! Йилнинг энг яхши футзал мураббийи номинациясини эълон қилиш учун Бекзод Маматқулов саҳнага таклиф этилди. Баҳодир Аҳмедов!

Жорий йил Кувайтда ўтказилган Осиё кубогининг бронза медали соҳиби, шуниндек, “Жиззах Кентекс” билан биргаликда мамлакат чемпионлиги ҳамда кубоги ғолиби — Баҳодир Аҳмедов “Энг яхши футзал мураббийи” совринини қўлга киритди.

Ўзбекистоннинг 2022 йилдаги энг яхши футзалчиси - Ҳусниддин Нишонов!

Бизда мусиқали танаффус, саҳна марказида Муниса Ризаева.

Аёллар Олий лигасининг энг яхши мураббийини МОҚ бош котиби Ойбек Қосимов аниқлаб беради. Владислав Хан!

Ўзбекистоннинг 2022 йилдаги энг яхши аёл футболчисини терма жамоамиз бош мураббийи Мидори Хонда аниқлаб беради. Мафтуна Шойимова!

"Сўғдиёна-W" клуби етакчиси Диёра Ҳабибуллаева аёллар Олий лигаси тўпурари совринини қабул қилиб олди.

Про лигасининг энг яхши мураббийи соврини ғолиби - Виктор Кумиков! Тажрибали мутахассис "Андижон" бош мураббийи сифатида Про лига чемпиони бўлди ва жамоасини элитага қайтарди.

Энди навбат Про лиганинг 2022 йилдаги энг яхши футболчиси номинациясига. Рўзимбой Аҳмедов!

“Бухоро” клуби аъзоси, жорий мавсумда 23 та гол билан Про Лига тўпурарига айланган Рўзимбой Аҳмедов “Про Лига футболчиси” совринини қўлга киритди.

Кетма-кет 4-йил "Пахтакор" футболчиси Драган Черан Суперлига тўпурари совринини қўлга киритмоқда.

Рўзиқул Бердиев - Ўзбекистон Суперлигасининг энг яхши мураббийи деб топилди.

Лига 8 ой давомида ойнинг энг яхшиларини ўзига хос услубда аниқлаб келди. Овоз бериш жараёнида Суперлиганинг 14 та бош мураббийи, 14 та клуб сардорлари, футбол мухлислари ва спорт нашрлари иштирок этади. Якунда эса улар йил давомида очко жамғариб боради. Пахтакор устози Максим Шацких фақатгина мавсум ўртасида жамоани қабул қилгани учун, якунда бу унинг умумий очколарига таъсир кўрсатди.

Ўзбекистон Суперлигасининг энг яхши футболчиси - Драган Черан! 

SPORTS.uz сайти директори Азамат Умаров U21 чемпионатини ўйинлари ва аёллар футболидаги марказий учрашувларни жонли эфирдаги трансляцияга олиб чиққани учун махсус соврин билан тақдирланди.

Шунингдек, Хайрулла Ҳамидовга ҳам Суперлига ва Про лига беллашувларини шарҳлаб боргани учун эсдалик соврини топширилди.

Ислом Тошпўлатовнинг голи Суперлигамизнинг 2022 йилдаги энг чиройли голи деб топилди.

Аёллар футболи бўйича Ўзбекистоннинг энг яхшилари аниқланмоқда. Ўзбекистоннинг 2022 йилдаги энг яхши аёллар мураббийи - Шерали Бобоқулов ("Сўғдиёна-W"). Шерали Бобоқулов тарихимизда илк бор аёллар ўртасидаги халқаро турнирда ўзбек жамоасини чемпион қилди.

ЎзПФЛ бош директори Диёр Имомхўжаев Ўзбекистоннинг 2022 йилдаги энг яхши аёл футболчиси совринини топширади. Маҳлиё Сарикова!

Бизда 2 та номинация қолди. Улардан бири Ўзбекистоннинг 2022 йилдаги энг яхши мураббийи. Соврин эгаси - Тимур Кападзе! Ёш мутахассис Ўзбекистон U23 жамоаси билан Осиё кубогида 2-ўринни қўлга киритди, "Олимпик" бошқарувида Суперлиганинг 6-ўрнини банд этди.

Мана энди энг муҳим палла! Ўзбекистоннинг 2022 йилдаги энг яхши футболчиси совринини топшириш учун саҳнага ЎФА президенти Абдусалом Азизов таклиф этилди. Жамшид Искандеров!

Энди навбат Суперлига рамзий жамоасига!

Дарвозабон: Ўткир Юсупов "Навбаҳор"

Ҳимоячилар: Дилшод Саитов "Насаф", Ҳусниддин Алиқулов "Насаф", Рустам Ашурматов "Навбаҳор", Фаррух Сайфиев "Пахтакор".

Ярим ҳимоячилар: Абдурауф Бўриев "Олимпик", Сардор Собирхўжаев "Пахтакор", Жамшид Искандеров "Навбаҳор".

Ҳужумчилар: Хуршид Ғиёсов АГМК, Отабек Жўрақўзиев "Олимпик", Драган Черан "Пахтакор".

Рамзий жамоа бош мураббийи - Максим Шацких "Пахтакор".

Шу билан маросим якунланди. Эътиборингиз учун раҳмат!