Энцо Фернандес: "Англия Премьер-лигаси темпини кўтара олмаганман"

"Челси" ярим ҳимоячиси Энцо Фернандес Англияга келган илк даврида дуч келган қийинчиликлар ҳақида гапирди. Аргентиналик футболчи 2023 йилнинг январь ойида лондонликлар сафини тўлдирганди, унинг трансфери 121 миллион еврога баҳоланган.

Авваллари ушбу келишув кўпчилик томонидан муваффақиятсиз деб баҳоланган, аммо вақт ўтиши билан Фернандес жамоанинг асосий етакчиларидан бирига айланди.

"Ростини айтсам, Премьер-лигадаги темпга тенг келадиган футбол дунёда йўқ, деб ўйлайман. Биринчи йилимда буни уддалай олмаганман – ўзимни жуда ёмон ҳис қилганман, уларга етиб боришим жуда қийин кечган. Жараҳатлар олганман. Ҳаммаси мана шундай бошланган эди" – деди Энцо "AlbicelesteTalk" нашрига.

24 ёшли футболчи жорий мавсумда тобора ишонч қозона бошлади ва кеча бўлиб ўтган Клублар ўртасидаги Жаҳон чемпионати финалида ПСЖга қарши баҳсда (3:0) жамоасига ғалаба қозонишда ёрдам берди.