Эрон терма жамоаси бош мураббийи ФИФА қаттиқ гапирди

Эрон терма жамоаси бош мураббийи Амир Галеноий жамоаси учун яратилган шароитлардан яна норозилик билдирди. Унинг таъкидлашича, 2026 йилги жаҳон чемпионати доирасида Эрон бошқа иштирокчиларга нисбатан ноқулай ҳолатга тушиб қолган. 

Янги Зеландияга қарши 2:2 ҳисобидаги дурангдан сўнг ва Бельгияга қарши учрашув арафасида Галеноий мусобақа ташкилотига оид эътирозларини очиқ баён этди.

«Биз ФИФАга расмий шикоят ёзмаганмиз, фақат ўз эътирозларимизни билдирдик. Бизга камида 24 соатлик танаффус керак эди, аммо 16 соат билан чекланиб қолдик. Шунинг учун машғулотни ярим йўлда тўхтатишга мажбур бўлдик. Бу чекловлар тайёргарлигимизни анча қийинлаштирди. ФИФА ва унинг ҳурматли президенти муаммоларимизни енгиллаштириш учун ҳаракат қилаётганини биламан, лекин ҳозирча амалда ўзгариш сезилмади», — деди Галеноий.

Мураббийнинг сўзларига кўра, Эрон делегацияси мусобақа давомида майдондан ташқарида ҳам бир қатор тўсиқларга дуч келган.

«Муаммоларимиз жуда кўп, айниқса майдондан ташқарида. Биз жуда кеч етиб келдик, янги шароитга мослашиш учун камида икки ҳафта вақт керак эди. Бундан ташқари, раҳбарларимиз ва оммавий ахборот воситалари вакилларига жамоани тўлиқ кузатиб боришга рухсат берилмади. Бу футбол руҳини сусайтиради. Бундай муносабат жаҳон чемпионати мақомига тўғри келмайди. Сиз жамоани таклиф қиласиз, лекин унинг штабига тўлиқ ишлаш имконини бермайсизми?» — дея таъкидлади мутахассис.

Галеноэининг айтишича, ФИФА президенти Жанни Инфантино бошчилигидаги ташкилот Эрон терма жамоасининг логистика билан боғлиқ муаммоларини ҳал этишга уринган, аммо бу саъй-ҳаракатлар кутилган натижани бермаган.

Маълумот учун, 2026 йилги жаҳон чемпионати АҚШ, Канада ва Мексика ҳудудларида ўтмоқда. Эрон терма жамоасининг навбатдаги ўйини Лос-Анжелес шаҳрида Бельгияга қарши бўлиб ўтади.