Европа грандлари нега Ҳусановга буқадар қизиқяпти?

29 ноябрь, 08:00
2
Футбол

Европа манбалари “Ланс”дан ўйнаётган Ўзбекистон миллий терма жамоаси футболчиси Абдуқодир Ҳусановнинг келажагини “Пари Сен-Жерман”, “Марсель”, “Арсенал”, “Тоттенхэм”, “Челси”, “Байер” каби машҳур клублар номи билан боғлаб, турли маълумотлар чиқармоқда.

Бу ҳар бир ўзбек футболи ишқибозини хурсанд қилади. Истеъдодли ёш ўйинчиларимизнинг Европанинг кучли лигаларида танилиши, бошқа ўйинчиларимизга ҳам ўша томонларга йўл очади, бу охир-оқибат терма жамоамизнинг кучайишига олиб келади.

Европа футболини ёритиб келаётган экспертлар ва манбалар Абдуқодир Ҳусановнинг қатор клублар назарига тушиши бежиз эмаслигини, ҳимоячимизнинг маҳорати, қобилияти ва салоҳиятини шарҳлашга, унинг ўйинларини таҳлил қилишга эътиблор қаратмоқда.

Sports.uz портали айрим манбаларнинг Абдуқодир Ҳусановга берган баҳосини ўзбекистонлик футбол мухлислари эътиборига ҳавола қилади.

- Абдуқодир Ҳусановни аввал Ўзбекистон, кейин Беларусдан топган селекционер мутахассислар бу ўйинчининг юқори салоҳияти ва бошқа тенгқурларидан бир эмас, икки бош устунлигини дарров пайқаган бўлса керак.

Бу ёш ҳимоячининг талантини юқори баҳоланган мутахассислар уни “Ланс”га тавсия қилганида клуб ҳеч қандай иккиланишларсиз футболчини ўз сафига қўшиб олди. 2023 йилнинг ёзида лансликлар бу трансферни 100 минг еврога ҳал қилди.

Ҳали Лига 1 ўйинларига мослашмаган Абдуқодир Ҳусанов машғулотларда катта таассурот қолдирдива 2023 йилнинг сентябрида “Мец”га қарши ўйинда дебют учрашувини ўтказди. Франциядаги илк мавсумидаёқ барча турнирларда ўн беш марта майдонга тушди.

Аслида келажакда Кевин Дансога ўринбосар сифатида олиб келинган Ҳусанов жорий мавсумнинг бошидан нималарга қодирлигини кўрсатиб келмоқда ва жамоанинг алиштириб бўлмас ўйинчисига айланди. У ҳаммани ҳайратга солаётганини тан олиш керак.

Унинг ўйинида деярли камчилик йўқ. Тўғри, сал қўпол, лекин техникаси зўр. Ҳозирнинг ўзида яккакурашлар ва тўпни эгаллаб олиш статистика бўйича лигада етакчи. Иккинчи қаватдаги деярли ҳар бир вазиятда рақиб ҳужумчисини ортда қолдиради.

Статистикага кўра, Ҳусанов жорий мавсумда Лига 1 ўйинларида 65 маротаба яккакурашларга киришиб, уларнинг 55 тасида ғолиб чиқди. Бу кўрсаткич бўйича 84,6 фоиз курашда ютиб чиққанини кўриш мумкин. Лигада камида 500 дақиқа тўп тепган марказий ҳимоячилар ўртасида бунақаси бошқа йўқ. У ҳар жойда ҳозиру нозир.

Салоҳияти юқорилигини нуқтаи назаридан Ҳусанов “Ланс”да энг қимматбаҳо ўйинчига айланиш эҳтимоли жуда катта. Абдуқодирда яқин келажакда замонавий энг кучли ҳимоячи бўлиш имконияти бор.

Яна бир статистик маълумот шундай дарак беради. “Ланс” Абдуқодир иштирок этган ўнта учрашувда жами ўз дарвозасидан еттита тўп олиб чиққан. Ҳусанов қизил карточка олгани учун лигада охирги икки ўйинда қатнаша олмади. Бу икки баҳсда асосий таянч ҳимоячисиз ўйнаган лансликлар бешта гол ўтказиб юборди.

Ўзбек ҳимоячисининг салоҳиятини юқори баҳолаётган айрим катта клублар 20 ёшли ўзбек футболчиси бўйича трансфер маълумотларини сўрай бошлаган. Даъвогарларнинг кўпайиши трансфер нархининг ошишига таъсир кўрсатяпти.

Харидорларга “Ланс”ни қимматбаҳо активини қўйиб юборишга кўндириш қийин кечади. Бунинг учун таклиф қилинаётган бадал пулини керакли даражага кўтариш лозим, - деб ёзмоқда нуфузли манбалардан ҳисобланган footmercato.net портали эксперти Себастьян Дени.

Эслатиб ўтамиз, Абдуқодир Ҳусанов футбол сир-асрорларини “Бунёдкор” академияси ўрганган. Профессионал футболчилик фаолиятини Беларуснинг “Энергетик-БГУ” клубида бошлаган. 2023 йилнинг ёзида “Ланс” ҳимоячини 100 минг евро эвазига ўз таркибига қўшиб олди.