Файзуллаев "Жаҳон чемпионати-2026" ҳақида: Бу бошқа даража

Ўзбекистон терма жамоаси ярим ҳимоячиси Аббосбек Файзуллаев 2026 йилги жаҳон чемпионати ҳақидаги таассуротлари билан ўртоқлашди.

Унинг таъкидлашича, жаҳон чемпионати — ҳар қандай футболчи учун энг юқори даражадаги мусобақа ҳисобланади.

"Жаҳон чемпионати — бу жаҳон чемпионати. Бу ерда мутлақо бошқа даража. Шахсан менинг фикримча, бу ҳар қандай футболчининг карьерасидаги энг нуфузли ва энг муҳим турнир", — деди Файзуллаев Fonbet’нинг YouTube-каналига берган интервьюсида.

Аббосбек Ўзбекистон терма жамоасининг тарихий дебюти ҳақида тўхталар экан, жамоанинг Колумбияга қарши ўйинини ҳам баҳолади.

"Жуда фахрланаманки, биз жаҳон чемпионатида дебют қилдик ва колумбияликларга қарши муносиб ўйнадик. Биринчи бўлимда, албатта, ҳаяжон бор эди, лекин ўйин давомида у тезда йўқолди", — дея қўшимча қилди у.

Эслатиб ўтамиз, Ўзбекистон терма жамоаси жаҳон чемпионатидаги илк учрашувида Колумбияга 1:3 ҳисобида мағлуб бўлди. Ўзбекистоннинг ягона голини Аббосбек Файзуллаев урди. Гуруҳ босқичидаги иккинчи ўйинда терма жамоа Португалияга қарши майдонга тушади.