Файзуллаевнинг илк мураббийи жаҳон чемпионатида Ўзбекистоннинг гуруҳдан чиқиш имкониятини баҳолади

Туркиянинг «Истанбул Башакшехир» клуби шарафини ҳимоя қилаётган Аббосбек Файзуллаевнинг илк мураббийи Дмитрий Ан Ўзбекистон терма жамоасининг жаҳон чемпионатидаги иштирокидан нималар кутаётгани ҳақида фикр билдирди.

"Ўзбекистон терма жамоасидан гуруҳ босқичидан чиқишини кутаяпман. Имконият бор. Албатта, айрим футболчиларда ҳаяжон бўлиши табиий, лекин тажрибали йигитлар ўзларини қўлга олишади ва ўз ўйинларини кўрсатишади, деб ўйлайман. Менимча, гуруҳдаги барча рақиблардан ўтиш мумкин, энг муҳими — руҳий тайёргарлик, омад ва рақибдан қўрқмаслик. Гуруҳ таркиби яхшироқ ҳам бўлиши мумкин эди, ёмонроқ ҳам. Биз барибир терма жамоамизни қўллаб-қувватлаймиз, ахир бу жаҳон чемпионатидаги илк иштирок. У ерда ўзбек мухлисларининг сони ҳам анча кўп бўлади", — дея таъкидлади Ан рус манбалари билан суҳбатда.

Эслатиб ўтамиз, ЖЧ‑2026 гуруҳ босқичида Ўзбекистон терма жамоаси Португалия, Колумбия ва Конго Демократик Республикаси терма жамоаларига қарши майдонга тушади.

2026 йилги футбол бўйича жаҳон чемпионати 11 июндан 19 июлга қадар АҚШ, Канада ва Мексика ҳудудида ўтказилади.