Файзуллаев рақиб устига қўрқмай бостириб борадиган футболчи!
Аббосбек Файзуллаев Ўзбекистонда 2023 йилнинг энг яхши футболчисига аталган совринни қўлга киритди.
20 ёшли легионеримизнинг навбатдаги индивидуал ютуғи у фаолият олиб бораётган Россия Премьер-лигасида ҳам кенг муҳокама қилинмоқда.
Sports.uz портали россиялик футбол экспертларининг Аббосбек Файзуллаевнинг ушбу муваффақиятига қандай муносабат билдирганини ҳавола этади.
Валерий Газзаев, ЦСКАнинг собиқ бош мураббийи:
Файзуллаев ёшга нисбатан анча етук футбол намойиш қилмоқда. Унинг ўйинини томоша қилиш жуда қизиқ. Аббосбек тезкор, техникаси зўр, футбол бўйича яхши таълим олган ўйинчи. У энг яхши сифатларини намойиш қилмоқда ва Ўзбекистонда энг яхши футболчи, деб эътироф этилгани ҳам бежиз эмас.
Биз унинг қобилияти борлигини кўриб турибмиз, лекин Файзуллаев ўз иқтидорини ривожлантиришдан тўхтамаслиги керак. У майдонда катта иштиёқ билан ўйнаяпти. Бу ЦСКА учун жуда зўр трансфер бўлди.
Владимир Пономарёв, ЦСКА собиқ футболчиси:
Россия Премьер-лигаси ўйинчиларининг техник даражаси паст. Файзуллаев бундан мустасно. Ўзбек футболчиси вазиятларни бир ўзи ҳал қилишга қодир.
Афсуски, чемпионатда индивидуал жиҳатдан ЦСКАдан Аббосбек Файзуллаев ва “Динамо”дан Константин Тюкавиндан бошқа кимнидир ажратиб кўрсатиш қийин..
Фақатгина Файзуллаев тўп билан югура олади ва дриблинг қўллайди. Буни бошқа ҳеч уддалай олмайди. Тюкавин эса, тўпни бехато қабул қилиб олишга уста.
Валерий Масалитин, футбол эксперти:
Файзуллаев Ўзбекистоннинг энг яхши футболчиси бўлишга муносиб. Тўғрисини айтсам унинг терма жамоадаги ўйинларини кузатганим йўқ. Агар Ўзбекистонда уни энг зўри, деб топишибдими, демак, Аббосбек бу совринга лойиқ.
Бугунги кунда Файзуллаев ЦСКАнинг энг яхши футболчиси. “Армиячилар” ҳужумида катта фойда келтиряпти.
Юрий Сёмин, “Локомотив” собиқ бош мураббийи:
Файзуллаев — истеъдодли футболчи. Техникаси кучли. Ҳозирги пайтда рақибга қўрқмай бостириб борадиган, бирга бир вазиятда ёки бир неча рақибни алдаб ўтиб кетадиган ўйинчилар кўп эмас. Бу қобилият жуда қадрланади. Файзуллаев тўпни ва тўп билан ишлашни яхши кўриши шундай кўриниб турибди. Бу борада у Хвича Кварацхелияга ўхшайди.
Фикрлар