Фердинанд Роналду ҳақида: Бу қария бир мавсум 20-25 та голни кафолатлайди

"Манчестер Юнайтед"нинг собиқ ҳимоячиси Рио Фердинанднинг фикрича, клуб ҳужумчи Криштиану Роналдуга муносиб ўринбосар топа олмайди.

“Одамлар Роналдуни қўйиб юбориш керак дейишади... Хўш, аввал 24-25 гол ура оладиган футболчини топдингизми? Кетишни илтимос қилса ҳам, қўйиб юбормаслик керак. Бу нотўғри деб ўйламайман.

Буни айтиш жуда осон: "Роналдудан қутулиш керак, унинг атрофида футбол қуриб бўлмайди", каби фикрлар нотўғри. У клуб хоҳлаганидан кўра кўпроқ нарсани бера олиши мумкин. Бу қария бир мавсум учун 20-25 та голни кафолатлайди. Буни унутмаслик керак”, - дея Фердинанднинг сўзларидан иқтибос келтиради “William Hill” нашри.

Ўтган мавсумда Роналду “Манчестер Юнайтед”нинг барча мусобақалар доирасидаги 39 та ўйинда майдонга тушиб, ўз ҳисобига 24 та гол ва 3 та голли узатмани ёздириб қўйган. Ҳужумчининг клуб билан шартномаси 2023 йилнинг 30 июнига қадар амал қилади.