ФИФА АҚШ терма жамоаси ўйинчисининг қизил карточкасини бекор қилди

Ҳужумчи ўтган босқичда майдондан четлатилганига қарамай, навбатдаги ўйинни ўтказиб юбормайдиган бўлди.

ФИФАнинг интизомий қўмитаси АҚШ терма жамоаси ҳужумчисига нисбатан автоматик равишда бир ўйинга дисквалификация қўлламасликка қарор қилди. Ташкилотнинг расмий сайтида хабар қилинишича, футболчига берилган жазо шартли равишда бир йиллик синов муддати билан тўхтатиб турилди.

- Интизомий кодекснинг 27-моддасига мувофиқ, Фоларин Балогунга нисбатан қўлланиши керак бўлган автоматик дисквалификация бир йиллик синов муддати билан тўхтатиб турилди, - дейилади ФИФА баёнотида.

1/16 финал босқичида Босния ва Герцеговинага қарши ўйинда (2:0) Балогун қўпол қоидабузарлик учун майдондан четлатилган эди.