ФИФА Жаҳон чемпионатида ҳакамлар иши танқид қилингани муносабати билан баёнот берди

ФИФА ҳузуридаги ҳакамлар қўмитаси раиси Пьерлуиджи Коллина жаҳон чемпионати ўйинларидаги ҳакамликка ҳеч ким, ҳатто ташкилот президенти Жанни Инфантино ҳам таъсир ўтказмаслигини таъкидлади.

Миср футбол ассоциацияси жаҳон чемпионати 1/8 финал босқичида Аргентинага қарши ўйинда (2:3) ишлаган француз ҳаками Франсуа Летексье фаолиятидан норозилик билдирган эди.

Коллинага кўра, асоссиз айбловлар футболда ўрин топмаслиги керак, ҳакамлар эса қарорларни ҳалол ва мустақил қабул қилади.

Халқаро футбол федерацияси (ФИФА) ҳакамлар қўмитаси раиси Пьерлуиджи Коллина жаҳон чемпионатидаги ҳакамликка ташқи босим йўқлигини, бу жараёнга ФИФА президенти Жанни Инфантино ҳам аралашмаслигини маълум қилди.

Бундан аввалроқ Миср футбол ассоциацияси (EFA) расмий баёнот эълон қилиб, жаҳон чемпионати 1/8 финалида Аргентинага қарши баҳсда ишлаган француз рефери Франсуа Летексье фаолиятидан қаттиқ норозилик билдирган, шунингдек, видеоҳақам (VAR) тизими билан боғлиқ айрим қарорларни ҳам танқид қилган эди.

“Албатта, қабул қилинган қарорларни конструктив муҳокама қилиш футболнинг бир қисми бўлиб қолади. Лекин асоссиз айбловларга бизнинг спортимизда жой йўқ. Жаҳон чемпионати ўйинларида ишлаётган ҳакамларнинг ҳалоллиги шубҳа остига қўйилмаслиги керак. Бундай ҳолатлар ҳакамлар ва уларнинг оилаларига нисбатан таҳдидларга олиб келиши мумкин. Бу мутлақо нотўғри. Шунингдек, ҳеч ким, ҳатто ФИФА президенти Жанни Инфантино ҳам ФИФА ҳакамларига таъсир кўрсатиши мумкин, деб даъво қилмаслиги лозим. Ҳакамлар қарорларни виждонан қабул қилади ва футболчилар ҳамда мураббийлар каби доим қўлидан келганича энг яхшисини қилишга интилади”, – дея Коллина сўзларидан ФИФА сайти иқтибос келтиради.