FIFA osiyolik futbolchini og‘ir jazoladi

Qatar milliy terma jamoasi yarim himoyachisi Assim Madibo 2026 yildgi jahon chempionatida raqibiga og‘ir jarohat yetkazgan qo‘pol harakati sababli terma jamoaning beshta o‘yiniga diskvalifikatsiya qilindi.

Hodisa guruh bosqichida Kanadaga qarshi kechgan uchrashuvning 51-daqiqasida sodir bo‘ldi. O‘yin Qatar terma jamoasining 0:6 hisobidagi yirik mag‘lubiyati bilan yakunlangan.

Madibo kanadalik yarim himoyachi Ismaël Konega nisbatan qo‘pol harakat qilgani uchun to‘g‘ridan-to‘g‘ri qizil kartochka oldi.

Ushbu to‘qnashuv oqibatida Italiyanning «Sassuolo» klubi sharafini himoya qilayotgan Kone katta va kichik boldir suyaklari sinishi jarohatini oldi. Shu sababli uning tiklanish jarayoni 4–5 oy davom etishi kutilmoqda.

FIFA Intizom qo‘mitasi Qatar futbolchisiga nisbatan besh o‘yinlik diskvalifikatsiya jazosini qo‘llash haqida qaror chiqardi. Biroq mazkur qaror himoya tomoni tomonidan hali ham apellyatsiya qilinishi mumkin.