ФИФА Мбаппе томон айтилган ирқчилик гапларини қоралади

ФИФА президенти Жанни Инфантино Франция терма жамоаси ҳужумчиси Килиан Мбаппега нисбатан Парагвай сенатори Селеста Амарилья томонидан айтилган ирқчиликка асосланган ҳақоратли сўзларни кескин қоралади. 
 

«Мен Франция терма жамоаси сардори Килиан Мбаппега нисбатан Парагвай сенатори Селеста Амарилья томонидан айтилган ирқчилик руҳидаги баёнотларни мутлақо қоралайман. Бутун футбол жамоатчилиги ва жамият Франция терма жамоаси сардори билан бирдамликда. Биз ирқчиликка қарши биргаликда курашишимиз ва уни енгишимиз керак.
 

ФИФА жаҳон чемпионати яна бир бор футбол жамият учун кучли бирлаштирувчи омил эканини исботлади. Спорт туримиз барча учун очиқ, хавфсиз ва инклюзив майдон бўлиб қолиши шарт. Биз ирқчилик деб аталмиш бу балони нафақат ажойиб ўйинимиздан, балки бутун жамиятдан бутунлай бартараф этиш учун саъй-ҳаракатларимизни давом эттирамиз», — деб ёзган Инфантино ўзининг инстаграм саҳифасида.
 

Селеста Амарилья Франция терма жамоаси капитанига нисбатан ирқчиликка асосланган ҳақоратлар билан чиққач, халқаро миқёсда шов-шувга сабаб бўлди. Бу баёнотлар Мбаппенинг пенальтидан урган голи Парагвайни жаҳон чемпионати 1/8 финалида мусобақадан чиқариб юборганидан сўнг ижтимоий тармоқларда эълон қилинган.
 

Сенатор футболчини «ўзини француз қилиб кўрсатишга уринаётган, мустамлакадан чиққан камерунлик» деб атади, уни манман, савиясиз ва хунукликда айблади. Шунингдек, у Мбаппе гўё она сути ўрнига кокос сути ичгани, у тинглаган «энг билимдон мавжудотлар» эса шимпанзелер бўлгани ҳақида ҳақоратли гаплар ёзди.

Килиан Мбаппе бу сўзларга қаттиқ жавоб қайтариб, Амарильяни «ўз лавозимига нолойиқ, нафратли аёл» деб атади. Франция футбол федерацияси эса сенаторнинг баёнотлари юзасидан прокуратурага расмий ариза киритди.