FIFA reytingida O‘zbekistonning jahon chempionati saralashidagi raqiblari nechanchi o‘rinlarda?

Bir necha kundan so‘ng Saudiya Arabistonida jahon chempionati saralashidan o‘rin olgan uchrashuvlar o‘tkaziladi. Markazlashgan bellashuvlarda O‘zbekiston milliy terma jamoasi 3 o‘yinda maydonga tushadi.

Vadim Abramov shogirdlari Singapur (7 iyun), Yaman (11 iyun) va Saudiya Arabistoni (15 iyun) bilan bellashadi. O‘yinlar oldidan biz turli ma’lumotlarni taqdim etmoqdamiz. Bu gal raqiblarimizning FIFA reytingidagi o‘rniga e’tibor qaratamiz.

Ushbu jamoalar orasida shubhasiz saudiyaliklar bizdan ancha oldinda. May oyidagi holatga ko‘ra Saudiya Arabistoni 66-pog‘onani band etgan. Bu Osiyodagi 6-jamoa ekanligini anglatadi. 

Yaman 145, Singapur 159-o‘rinlarda ko‘rsatilgan. Biz o‘yinlarni o‘tkazib bo‘lgan Falastin 104-o‘rinda. Vakillarimiz esa 86-pog‘onani band etishgan.