Флик “Барса”дан кетиши кутиляпти, ўрнига икки номзод бор

Нуфузли манбалардан бири – El Chiringuito нашри “Барселона”ни Испания чемпионига айлантирган Ханс-Дитер  Фликнинг клубдан кетиш эҳтимоли ва унинг ўрнини эгаллаши мумкин бўлган номзодлар ҳақида хабар берди.

Манбанинг таъкидлашича, Каталония суперклубида немис мураббийининг келажагига нисбатан мавҳумлик кучайиб бормоқда. Фликнинг жорий мавсумдан кейин клубдан кетиши бош мураббий сифатида қолишига қараганда аниқроқ.

Ханс-Дитер Флик жамоанинг беқарор натижалари туфайли катта босим остида қолган ва ўзига нисбатан билдираётган танқидларнинг катта қисмини адолатсизлик,  деб ҳисоблайди.

Вазият бир қатор ўйинчилар, хусусан, Ламин Ямал ва Роберт Левандовски билан кескин муносабатлар туфайли янада ёмонлашмоқда.

Клуб президенти Жоан Лапорта ва спорт директори Деку аллақачон янги бош мураббий масаласини кўриб чиқмоқда. Асосий фаворит – Луис Энрике, аммо ПСЖ уни қўйиб юбориш ниятида эмас.

Иккинчи номзод  эса, Сеск Фабрегас. Ёш мураббий “Комо”даги иши билан гранд клубларда жуда яхши таассурот қолдирмоқда ва каталонияликларнинг эътиборини тобора кўпроқ жалб қилмоқда.