ФР: Тўхтасинов билан Насибуллаев нега кўринмаяпти?

Coca-Cola Суперлиганинг 2-турида ишлайдиган ҳакамлар рўйхати эълон қилинди.

Очилиш баҳсларини бошқарган реферилар яна майдонга чиқишларини (фақат Лутфуллин ва Шукуруллаев жой алмашган) ўқиб табиий савол пайдо бўлди: Нега Темур Тўхтасинов ҳамда Шавкат Насибуллаев сингари тажрибали ҳакамлар кўринмай қолишди?

Бунга жавоб топиш мақсадида ЎзФҲМ билан боғландик. Марказ директори Лазиз Қўчқоровнинг маълум қилишича, бу ҳолат мавсумолди ўқув-машғулот йиғинлари билан боғлиқ. Синовларда ўзини яхши кўрсата олмаган реферилар чемпионат стартини дисквалификация билан бошлашди. Жумладан, Шавкат Насибуллаев Суперлиганинг 2та турини ўтказиб юборса, Темур Тўхтасинов билан ОФК кубогида иштирок этаётган Аҳрол Рисқуллаев 3-турдан кейингина қайтишлари мумкин экан. Шунингдек, бу четлатиш Про лига баҳсларига даҳл қилмаслиги алоҳида таъкидланди.

Маълумот учун, 39 ёшли Шавкат Насибуллаев Суперлиганинг ўтган мавсумида 15та учрашувни бошқарган эди. Андижонлик Темур Тўхтасинов 12, ФИФА рефериси Аҳрол Рисқуллаев эса 14 ўйинда ишлаган.