Футболчининг отаси Марина хонимни “шантаж” қиляпти

“Челси” раҳбарияти мавсум охирига келиб, жиддий муаммога дуч келади. Жамоанинг асосий ҳимоячиларининг амалдаги шартномаси якуналади. Антонио Рюдигер ва Андреас Кристенсенни янги битимга кўндириш қийин бўлмоқда. Рюдигер анчадан бери фантастик маош талаб қиляпти.

Кристенсеннинг манфаатларини ҳимоя қилаётган отаси Рюдигернинг йўлидан боришга қарор қилди. У клубга Андреас керак бўлса, маошини сезиларли даражада кўтариш лозимлигини таъкидлаяпти.

Аввалроқ, Андреас Кристенсен “аристократлар” берган шартномани маъқуллаган эди. Бироқ ишга отаси аралашганидан кейин у битимни имзолашни ортга сура бошлади.

Андреаснинг отаси клубдаги трансферларга масъул директор Марина Грановская билан учрашиб, агар у янги шартномада маошни оширмаса, ўғлини ёзда бошқа клубга олиб кетиш учун қўлидан келганини қилишини айтган.

“Челси” мутасаддилари ҳали бу таклифга муносабат билдиргани йўқ.