Гол урган легионеримиз: Биз ўйлагандек бўлмади!

Ўзбекистон ва Беларусдаги фаолиятидан кейин Қозоғистон премьер-лигасида тўп тепаётган Шаҳбоз Умаров учун янги мавсум жуда муваффақиятли бошланди.

Ҳужумкор футболчимиз “Ордабаси”да асосий футболчилардан бирига айланган. Шаҳбоз кетма-кет икки учрашувда рақиблар дарвозасини ишғол қилишга муваффақ бўлди. “Жетису”га қарши баҳсда Умаров жамоасининг иккинчи голига муаллифлик қилиб, ғалабани мустаҳкамлади.

Учрашувдан кейин Шаҳбоз Умаров клуб матбуот хизмати вакиллари саволига жавоб қайтарди.

- Шаҳбоз, ғалаба билан табриклаймиз. Ўйин қандай бўлди?

- Табрик учун раҳмат. Беллашув аввалида ўйинга киришиб олиш анча оғир бўлди. Старт биз кутганимиздек бўлмади. Барибир ўзимизнинг голларимизни кирита олдик.

- Кетма-кет иккита баҳсда гол урдинг. Ҳиссиётлар қандай?

- Албатта, ҳар бир ўйинчи жамоасининг ғалабасига ҳисса қўшишни ва ҳар бир учрашувда тўп киритишни истайди.

Мен ҳам ҳар бир учрашувга ана шу мақсадда тушаман. Жамоадошларимга раҳмат, улар майдонда жуда катта ҳажмдаги ишларни амалга оширмоқда. Шунингдек, мухлисларнинг ажойиб муҳит ярата олаётганини ҳам эътироф этган ҳолда, бизларни қўллаб-қувватлаб туришганига миннатдорлик билдираман.

Дарҳақиқат, “Ордабаси” жорий мавсумда ўз олдига катта мақсадларни қўйган. Ана шу режани амалга ошириш учун чемпионат бошланишидан олдин таркибини сезиларли даражада кучайтирди.

Ҳужум чизиғига Бобур Абдухолиқовни олиб келди. Бобур ўтган мавсумда Беларусь чемпионатининг қаҳрамони бўлганди.

Шунингдек, шимкентликлар Шаҳбоз Умаровнинг трансферини БАТЭдан сотиб олди. Аслида Шаҳбоз ўтган мавсумнинг иккинчи ярмини ижара асосида “Ордабаси”да ўтказган эди. Ўтган йил бошида ҳужумкор футболчимиз БАТЭ бош мураббийи билан келиша олмай қолгани учун ўйинларга қўйилмади.Ёзда клуб уни Қозоғистонга ижарага жўнатди.

Ҳар ҳолда Шаҳбоз муваффақиятсиз бошланган мавсумни Қозоғистон кубогини қўлга киритиш билан якунланди. Энг асосийси эса, шимкентликларнинг ишончини қозониб, ўзига муқим иш топди.

Энди Бобур Адухолиқов билан бирга Шаҳбоз Умаров “Ордабаси”ни Премьер-лига чемпионига айлантиришга уринмоқда.

Дарҳақиқат, “Жетису”га қарши ўтган баҳсда Бобур Абдухолиқов ҳам гол уриб, учрашувнинг энг яхши футболчиси совринини қўлга киритган бўлса, Шаҳбоз Умаров Goal.kz сайти талқини бўйича 3-тур рамзий терма жамоасидан жой олди.

“Ордабаси” чемпионат доирасида навбатдаги учрашувни сафарда ўтказади. Шимкентликлар 1 апрель куни “Астана” жамоаси меҳмони бўлади.

Легионеримиз: Икки голим уч очко келтирди!

Ҳаммасини икки ўзбек легионери маҳорати ҳал қилди! Буни рақиб ҳам тан олди!

Легионерларимиз Премьер-лигани “ёрворди”!

Шомуродов бор ва Ўзбекистон янги чемпионатда юқори ўрин учун курашади!

Шомуродовга Дибала қачон жойини бўшатиб беради?

Шомуродов нега “Лилль”, “Эвертон”, “Вальядолид” ва “Байер” таклифини қабул қилмади?