"Hakamning qarorlari o‘rganib chiqiladi, endi xotirjammiz". Hakim Fuzaylov "Buxoro"ni qanday "uyg‘otgani", "Turon"ga qarshi o‘yin va undagi hakamlik to‘g‘risida gapirdi
Qayta “uyg‘ongan” “Buxoro” klubi endi ancha xavfli raqibga aylandi. Pro liganing 19-turida safarda “Turon”ga qarshi qanday o‘ynaganini ko‘pchilik ko‘rdi. 2:2 hisobida durang qayd etilgan bahsda o‘yin bo‘yicha buxoroliklar g‘alabaga ko‘proq haqli edilar.
O‘yinni boshqargan hakamning ishi esa hakamlar qo‘mitasi tomonidan ko‘rib chiqilmoqda. Gap nima haqida ketayotganini tushungan bo‘lsangiz kerak. “Buxoro” bosh murabbiyi Hakim Fuzaylov esa Sports.uz saytiga intervyu berdi.
- Hakim Qayumovich, “Turon” – “Buxoro” o‘yinini ko‘rdik. Bellashuv ancha shiddatli o‘tdi. Uchrashuvdan ko‘nglingiz to‘ldimi?
- Ha albatta, ko‘nglim to‘ldi. Jamoadan xursandman. Qolaversa, chempionatda pley-off boshlandi. Bu bosqichdagi hamma bellashuvlar shu ruhda o‘tishi tabiiy. Chunki bir nechta jamoalar o‘z oldiga Superligaga qaytish vazifasini qo‘ygan. Bevosita boshqaruvimdagi klubga kelsam, hech kimga e’tiroz bildira olmayman. Yigitlarga rahmat. Ular to‘pni ko‘proq nazoratida ushlab turgan holda raqibdan ustunlik qilishdi. Shu sababdan ham bahs davomida xavfli vaziyatlarni ko‘proq biz amalga oshirdik.
- Uchrashuv oxirida raqib jarima maydonchasi ichida to‘p bir emas, balki ikki futbolchining qo‘liga tekkanini hamma ko‘rdi. O‘z navbatida bunga e’tiroz bildirdingiz. Lekin hakam penalti belgilashni lozim topgani yo‘q. O‘sha vaziyat haqidagi fikringiz qanday?
- Bularning bari his-hayajonlar bilan bog‘liq. O‘sha vaziyatni ko‘rdim. Ha, to‘p bir emas, ikki nafar o‘yinchining qo‘liga tegdi. E’tirozimga javoban esa hakam menga sariq kartochka ko‘rsatdi. Albatta, hakamlar qo‘mitasi o‘sha vaziyatni muhokama qilishsa kerak. Bunday hol o‘yinlarda yuz berib turadigan oddiy vaziyatlardan biridir. Shunday mahallarda esa kishi ehtiroslarni jilovlay olmasdan qoladi. Menda ham shunday hol kuzatildi.
- Bahs davomida sizlarning darvozangiz tomon ikki bor penalti belgilandi. Chetdan qaraganda ham bu jarima to‘piga tortadigan holatlardek ko‘rinmadi. Sizningcha, o‘sha penaltilar shubhali qarorlar evaziga darvozangizga qo‘yildimi?
- Men bu vaziyatlar yuzasidan bir narsa deya olmayman. Chunki holatlarni ko‘rishdan ancha uzoqda edim. Biroq bunday qarorlarni baholaydigan o‘yin nazoratchisi, komissiya a’zolari bor. Boz ustiga hakamlar ishini baholash biz murabbiylarning emas, balki ularning vakolatiga kiradi.
- Demak, “Buxoro” klubi hakamlar ustidan O‘FAga arz qilmaydi, shundaymi?
- Ha, bunday yo‘l tutmaydi. Qolaversa, o‘yindan keyin undagi ayrim qarorlar o‘rganib chiqilishi xususida ma’lumot tarqatildi. Shu sababdan bu masalada xotirjammiz.
- “Buxoro” oxirgi paytga kelib butkul boshqacha – hujumkor o‘yin namoyish etishga tushdi. Aytmoqchimanki, klub o‘yini “ochildi”. Siz buning uchun nimani o‘zgartirdingiz?
- Albatta, professional futbolda nimanidir darhol o‘zgartirib bo‘lmaydi. Buning uchun vaqt kerak. Nazarimda, tarkib barqarorlashdi. Shu sababdan ham klub o‘yinida o‘zgarish ko‘zga tashlanmoqda. Asosiysi, bizda jangovar holatdagi jamoa shakllangan. Ustiga-ustak “Buxoro” o‘z oldiga qo‘yilgan vazifani bajarish harakatiga kirishgan. Mavsumning birinchi qismida amalga oshirilgan ishlar o‘z mevasini bera boshladi, desam mubolag‘a bo‘lmaydi. Bu butun jamoa – rahbariyat, xodimlar, murabbiylar va futbolchilarning astoydil qilayotgan ishlari tufayli ro‘y bermoqda. Agar klubni Superligaga qaytara olsak, shunda hammamiz yaxshi ishlabmiz, deb baralla ayta olamiz.
- “Buxoro”ga yangi kelgan futbolchilardan ko‘nglingiz to‘lyaptimi?
- Boya aytganimdek, butun jamoadan xursandman. Bevosita yangi o‘yinchilarga to‘xtalsam, ular boshqa sheriklari bilan mashg‘ulotlar va uchrashuvlar paytida osonlikcha til topisha olishni uddalashdi.
- Oxirgi savol: o‘tgan yili “Dinamo” klubini Superligaga olib chiqqandingiz. Guvohi bo‘lib turganingizdek, joriy mavsumda “Dinamo” yaqqol autsayder bo‘lib turibdi. Shu bois chempionat davomida klubda murabbiylar almashyapti. Ayting-chi, agar jamoani o‘zim boshqarishda davom etganimda “Dinamo” shu ahvolga tushmagan bo‘lardi, degan fikr xayolingizdan o‘tadimi?
- Men endi “Dinamo”da emasman. Shu sababli bu borada bir narsa deyishim amrimahol. Ammo, albatta, sobiq jamoamni bunday ahvolda ko‘rish meni iztirobga solmasdan qo‘ymayapti. Biroq jamoa ichida nimalar ro‘y berayotganidan mutlaqo bexabarligim tufayli bu haqida gapirishim to‘g‘ri bo‘lmaydi. Faqat shuni aytishim kerakki, Samarqanddek ajoyib shahar vakilining Superligadagi ayanchli holini ko‘rishdan achinayotganim ayni haqiqat. Nazariy jihatdan “Dinamo”da Superligada jon saqlab qolish imkoni bor. Mavsum tugashiga hali 7 tur qolgan. Lekin bu ishni uddalash qiyin bo‘lishi turgan gap. Klubga qolgan o‘yinlarda omad tilab qolishdan boshqa choram yo‘q.
Fikrlar