"Ҳали футбол ўйнагим келаётгани учун у ерларга боргим келмади" ёхуд Бобур Йўлдошевни 95 фоизга ишонтиришди

Кеча сайтимиз орқали хабар берганимиздек, исъедодли ҳимоячи Бобур Йўлдошев АГМКдаги уч йиллик фаолиятидан кейин клубни тарк этишга қарор қилди. Янги мавсумни эса “Қизилқум”да ўтказадиган бўлди. Футболчи Sports.uz мухбири билан суҳбатда аввало АГМКни тарк этиши сабаби ҳақида гапирди.

- АГМК клубида уч йил фаолият кўрсатдим. Шунчаки, муҳитни ўзгартиришни истадим. Бошқа клубга ўтишга қарор қилдим. Олмалиқдаги уч йил жуда яхши хотирамда қолди. АГМКда биринчи йил йиғилганимизда ўртамиёна жамоа эдик ва ўшанда 8-ўринни олдик. Бир йилдан кейин мавсумни 3-поғонада тугатдик. Ўтган йили ҳам ўша натижани такрорладик. Шунинг учун у ердаги фаолиятимни ёмон ўтди, демаган бўлардим. У ерда озми-кўпми, дўстлар орттирдим. Янги мураббийлар билан ишладим. Албатта, бу кейинги фаолиятимда фойда бўлади. АГМКда жуда яхши таассуротлар қолди. Ҳаммаси учун АГМКга раҳмат!

- Янги мавсумдаги режангиз қандай?

- Ҳозирча оғзаки келишувга эришдик. Насиб қилса, мавсумни Навоийда, “Қизилқум” таркибида бошлайман.

- Аслида Ҳамид Актамовнинг ушбу таклифига қандай қараяпсиз?

- Менга билдирилган ушбу чақирувга албатта ижобий қарайман. Клуб томонидан ўтган йили, аниқроғи янги йилдан аввал таклиф билан чиқишганди. Бу таклиф устида ўйлаб кўрдим. Миржалол ака Қосимовни олдига бориб бу хусусида гаплашдим. Мени тўғри тушунди ва омад тилади. “Қизилқум”да нотаниш бўлмаган футболчилар йиғиляпти. “Локомотив”га ўтаётган ўйинчилар ҳам бор ва улар билан бирга ўйнаганмиз. Ўйлайманки, бу йил “Қизилқум”да яхши жамоа шаклланади. Клуб ўз олдига фақат юқори мақсадларни қўйяпти. Шуниси менга қизиқ туюлди.

- Янги мавсумда бошқача қиёфадаги “Қизилқум”ни кўрадигандекмиз. Улар сизни ўз мақсадига қанчалик ишонтира олди?

- 95 фоизга ишонтирди, десам бўлади. Чунки клубдаги ўйинчиларни биламан. Янги футболчилар ҳам жамоа билан келишувга эришишган. Биз мақсад йўлида ҳаракат қиламиз, қолгани Худодан. Бундай жамоалар кўпайишидан фақат ўзбек футболи ютади. Айниқса, чемпионлик учун курашадиган клублар ортса рақобат ҳам янада яхши бўлади. Рақобат ошса, чемпионатдаги интрига ҳам кучаяди, қизиқиш ҳам тобора ортади

- Сиз учун таклифлар кўпмиди?

- Бор эди, йўқ демайман. Менга ҳар йили четдан вариантлар пайдо бўларди. Лекин кетишни ўзимга эп кўрмадим. Ўша мамлакатларнинг чемпионатлари бизникига қараганда савияси пастроқ. Ундан кўра ўзимизда қолиб фаолиятимни давом эттирганим яхши эди.

- Айнан қайси мамлакатлардан қизиқишлар бўлди?

- Ҳар йилгидек Қатар биринчи лигасидан, Ҳиндистон, Бангладеш, Малайзия каби чемпионатлардан таклифлар бўлди. Кўриб турганингиздек, номи билан айтиб турибди...ҳали бундай жойларда ўйнашга улгураман.

- Демак, уларнинг молиявий имконияти сизни ўзига жалб қилмади-а?

- Албатта, ҳамма кўпроқ молиявий тарафига қизиқади. Тўғри, уларнинг таклифи биздан кўра молиявий томондан яхшироқ. Очиғини айтаман, ҳали футбол ўйнагим келаётгани учун у ерларга боргим келмади. Ўша чемпионтларга борсангиз хоҳлайсизми-йўқми, фаолиятингизга ҳам бироз таъсир қилиши мумкин.

- Ундан кўра, “Қизилқум” сизни ҳар жабҳада қониқтирди...

- Ҳа, ҳар томонлама. Айтяпман-ку, яхши футболчилар йиғиляпти. Яхши мураббий ҳам олиб келамиз дейишяпти. Албатта қониқтиради. Футболчига шаклланган ва ютиб турадиган жамоа бўлса бўлди. Шундай ўйинчи қолган ҳамма нарсадан завқ олаверади.

- Шартнома қачон имзоланади?

- Тез орада клубга қўшиламан. Яқин кунларда аниқ бўлиб қолади.