Флик йирик мағлубиятдан сўнг мухлисларга мурожаат қилди!

Испания Кубогининг ярим финал босқичида "Атлетико" ўз уйида "Барселона"ни йирик 4:0 ҳисобида мағлуб этди. Учрашувдан сўнг "кўк-анорранглилар" бош мураббийи Ҳанси Флик матбуот анжуманида иштирок этиб, ўйин ҳақида ўз фикрлари билан ўртоқлашди.

"Ҳали ҳеч нарса ҳал бўлмади. Жавоб ўйини ўз стадионимизда бўлади. Стадионимизни тўлдириб, бизга қўллаб-қувватлаш кўрсатадиган барча мухлисларга эҳтиёжимиз бор.

Бу футбол. Қайтиш имкониятини ҳали инкор этиб бўлмайди. Бизга мухлислар керак. Финалга чиқиш учун ўз майдонимизда 90 дақиқа давомида курашамиз. 

Оддий қилиб айтганда, бугун жуда ёмон ўйнаганимизни тан олишимиз керак. Албатта, муаммо биринчи 45 дақиқада, ҳатто ундан ҳам кўпроқ вақтда бўлди. Бу биз учун сабоқ бўлди ва баъзан бундай сабоқ мавсумнинг тўғри пайтида келиши ҳам фойдали. 

Мухлисларга мурожаатим? Бугун оғир тун бўлди, аммо олдинда яна бир ўйин бор ва биз уни ютишни хоҳлаймиз", — деди мутахассис.