"Ҳеч кимни хафа қилгим келмаяпти-ю..." - Ойбек Усмонхўжаев Шацких жамоасига қандай футболчиларни етказиб беряпти?

Футбол аудиториясидаги ёши улуғ мухлислар Ойбек Усмонхўжаевни яхши эслаб қолишган. Тўпурар ҳужумчи сифатида ўз ишқибозларига эга эди. Ҳозирги кунда мураббийлик ишига шўнғиб кетган Усмонхўжаев икки йилдан бери “Пахтакор” U-21 жамоаси бош мураббийи сифатида ишлаб келмоқда ва чемпионатда кетма-кет икки мавсум 3-ўринни эгаллаб келишмоқда.

Айни пайтда ушбу мураббий ўз жамоаси билан янги мавсумга тайёргарлигини давом эттирмоқда ва “Пахтакор”нинг асосий таркиби учун иқтидорли ёшларни етиштиришга ҳаракат қиляпти. “Пахтакор” U-21 жамоасининг “Андижон”га қарши ўртоқлик учрашувидан сўнг Ойбек Усмонхўжаев билан суҳбатда бўлдик.

- Ушбу ўртоқлик учрашуви “Андижон” учун ҳам, “Пахтакор” U-21 учун ҳам зарур эди. Бош мураббий сифатида ўйиндан қандай хулоса чиқардингиз?

- Қандай хулоса чиқаришим мумкин? Аввало, айтишим керакки, “Андижон” клуби Суперлигага чиқди ва уларга омад тилайман. Бу учрашув орқали шогирдларимизни кейинчалик нима қила олишлари мумкинлигини кўриб олдик. Айниқса, катта футболчилар орасида ўзимизнинг йигитларни имкониятларини чамалаб олдик. Бизга шуниси керак эди. Қайси бола бизда ўйнай олади, қайси бола асосий таркибга ўтади? Ҳаммасини кўриб чиқамиз.

- “Андижон” кўрсатган ўйин борасида нима деган бўлардингиз?

- Кўриниб турибдики, уларда катта “нагрузка” бўлган. “Андижон”ни ўз режаси бор. Таркибдаги футболчилари тажрибали. Ўйнайдиган йигитлар. Бизга дарс беришди.

- Суперлигадаги имкониятини қандай баҳолайсиз?

- Бирор нима дея олмайман. Яхши мураббий бор ва жамоани яхши тайёрлай олади. Қаерда ишлаган бўлса ҳам яхши таассурот қолдирган. Менимча, “Андижон” чемпионатда рақибларига муаммолар туғдира олади.

- Учрашувни “Пахтакор” бош мураббийи Максим Шацких стадионда кузатиб борди. Унинг трибунада экани шогирдларингизга қанчалик таъсир кўрсатди?

- Ёш болалар бош мураббий келганида ҳар доим ҳаракат қилади. Бу турган гап. Шацких асосий жамоада қандай иш қилаётган бўлса, биз ҳам ўринбосарлар билан шунга ўхшаб иш кўрамиз. Қўл остимиздаги футболчиларни тезроқ ўсишини истаймиз.

- Мухлислар сизни ўз вақтида қандай футболчи бўлганингизни яхши билишади. Ҳозирда мураббий ролидасиз. Футболчиликдаги статусингизни мураббийликда ҳам сақлаб қолиш қанчалик қийин кечяпти, деб ўйлайсиз?

- Албатта қийин бўлади. Лекин ҳаракат қиламиз. Ҳар қандай аскарни ҳам генерал бўлгиси келади-ку (кулади). Ҳа, мураббийлик иши қийин. Футбол ўйнаган пайтларимизда бундай нарсаларни ўйламасдик. Аммо ҳаракатдан тўхтамаймиз.

- Мураббийликдаги асосий мақсадингиз қандай?

- Биринчи мақсадимиз, шу таркибдаги ўйинчиларни тезроқ асосий таркибга муносиб сифатида етказиб бериш. Қолганини кейин ўйлаймиз.

- Зўр ҳужумчи бўлгансиз. Шундай экан, ҳозирги вақтда аввалгидек тўпурар ҳужумчилар етишмаяпти, қабилидаги фикрларни кўп эшитамиз. Бундай қарашларга қўшиласизми?

- Ҳеч кимни хафа қилгим келмаяпти-ю, рости, яхши ҳужумчилар етишмаяпти. Тўғри, ҳужумчилар бор. Балки уларга ўз вақтида тўпни етказиб берадиганлар камроқдир ёки ҳимоячилар кучлироқдир. Футбол ўсяпти. Ҳозир тактика бўйича ҳамма тайёрланишни биляпти. Рақибда қандай ҳужумчилар борлигига қараб ҳимоячилар ҳам тайёрланяпти.

- Шацких ҳам ажойиб ҳужумчи бўлган. Уни мураббийлик ишини кузатяпсиз. Ундан ўзингиз учун мураббийликда қандай янгиликларни оляпсиз?

- Кўпроқ европача услубни қўллаяпти. Ўзи ҳам яхши клубларда ўйнаган. Кўп нарсани билади. Табиийки, ундан анча-мунча билимларни оляпмиз. Энди натижани кўрамиз. Қайсидир футболчиларимиз Шацких жамоасига тушадиган бўлса, демак, биз тўғри ишлаётган бўламиз.

Шуҳратбек Жўраев.