Ҳусанов аср рекордида иштирок этди

Ўзбекистон миллий терма жамоаси марказий ҳимоячиси Абдуқодир Ҳусанов ўйнаётган “Манчестер Сити” жорий мавсумда ўзи иштирок этаётган барча турнирлар – Премьер лига, Лига кубоги, Англия кубоги ва Европа Чемпионлар лигасида ғолиблик учун курашмоқда.

Хосеп Гвардиола шогирдлари Англия кубогидаги юришини учинчи босқич, яъни 1/32 финалда бошлади. Қуръа натижасига кўра, “шаҳарликлар” қуйи лига вакили “Эксетер Сити”ни “Этихад” стадионида қабул қилди.

Абдуқодир Ҳусанов учрашувни бошланғич таркибда бошлади ва Хосеп Гвардиола жамоасида ўйинни тўлиқ ўтказган олти нафар футболчидан бири бўлди.

21 ёшли легионеримиз Макс Аллейн ва Родри томонидан урилган дастлабки иккита голда бевосита иштирок этди. Биринчи бўлимдаги яна иккита тўпни “Эксетер Сити” вакилларидан Жек Хейз ва Жек Фицвотер ўз дарвозасига киритиб қўйди.

Ўйиннинг иккинчи ярмида Рико Льюс дублга эришган бўлса, Антуан Семеньо, Тижани Рейндерс, Нико О'Райли ва Райан МакАйду биттадан гол урди. Рақибнинг ягона голи Жорд Брич ҳисобига ёзилди.

Учрашувдаги 10:1 ҳисоби XXI асрнинг янги рекорди сифатида қайд этилди.

OptaJoe статистика  маркази маълумотларига кўра, “Манчестер Сити” олий дивизионда иштирок этувчи инглиз клублари орасида барча мусобақаларда бир ўйинда 10 ва ундан ортиқ гол урган илк жамоа бўлди.

Бундай натижа охирги марта ўтган асрда, янада аниқроғи 1986 йилнинг сентябрда, Лига кубоги доирасида кузатилган эди. Унда “Ливерпуль” футболчилари “Фулхэм” дарвозасига жавобсиз ўнта тўп киритган.

Англия кубоги доирасида эса, бу каби натижа 1960 йилнинг  февраль ойидан бери кузатилмаган. Ўшанда “Тоттенхэм” голларга бой бўлган баҳсда “Крю” жамоасидан 13:2 ҳисобида устун келган.

Шу тариқа, “Манчестер Сити”нинг Англия кубогида “Эксетер Сити” устидан 10:1 ҳисобидаги ғалабаси тарихий натижа сифатида қайд этилди. Ва ушбу баҳсда тўлиқ ўйнаган Абдуқодир Ҳусанов ҳам ушбу рекорд иштирокчисига айланди.

Эслатиб ўтамиз, Абдуқодир Ҳусанов 2025 йилнинг 20 январь куни Франциянинг “Ланс” клубидан 40 миллион евро эвазига “Манчестер Сити”га ихтиёрига кўчиб ўтган эди. Иқтидорли ҳимоячи жорий мавсумда Англия Премьер-лигаси, Лига кубоги, мамлакат кубоги ва Европа Чемпионлар лигасида жами 12 та учрашувда иштирок этди.

Ҳусановнинг 11 та гол бўлган учрашувдаги ўйини қандай баҳоланди?

Машҳур юлдузлар ҳам Шомуродов кўрсаткичларига яқинлаша олмаяпти

Ҳусановга қарши тузилган режа иш бермади