Ҳусанов бўйича “Челси”нинг позицияси маълум бўлди...

30 октябрь, 19:00
1
Футбол

Европа футболида Абдуқодир Ҳусанов ҳақидаги хабарлар тобора кўпайиб бормоқда. Ҳамюртимиз клуб ва миллий терма жамоа миқёсида юқори савияда ўйнашда давом этяпти. Бу эса, кучли клубларнинг эътиборидан четда қолаётган йўқ.

Англия футболини кенг ёритишга алоҳида урғу берадиган teamtalk.com портали Англия Премьер-лигаси клубларининг “Ланс” етакчиси айланиб бораётган легионеримизга жиддий қизиқиш билдираётгани тасдиқлаб, “Челси”нинг трансфер сиёсатини таҳлил қилиб берди.

- “Челси” ва “Тоттенхэм” Франция чемпионатида “Ланс” шарафини ҳимоя Абдуқодир Ҳусановга даъвогарлик қилаётган Англия клублари орасида энг номдорлари ҳисобланади.

Ҳусанов 20 ёш бўлишига қарамай, профессионал даражада юқори муваффақиятларга эришмоқда. “Ланс”даги иккинчи мавсумини бошланғич таркибнинг муқим ўйинчиси сифатида бошлади ва ҳаммада жуда яхши таассурот қолдиряпти.

Янги мавсумдан бери унинг ўйиниларини Европанинг бир қатор жиддий клублари мунтазам кузатиб келяпти.

Биздаги маълумотларга кўра, Премьер-лига вакилларидан “Челси”, “Тоттенхэм”, “Ньюкасл”, “Кристал Пэлас”, “Брентфорд”, “Брайтон” ва “Вест Хэм” Ҳусановни кузатиб бормоқда. Айрим манбаларнинг маълум қилишича, 20 ёшли ўйинчи Германиянинг “Байер”, “Лейпциг”, Италиянинг Наполи”, “Аталанта” ва Франциянинг “Марсель” каби клублари нишонида турибди.

Ҳусанов айни пайтда Франция чемпионатининг энг зўр марказий ҳимоячиларидан ҳисобланади ва жисмонан бақувватлиги ва шиддатли ўйин услуби туфайли жамоадошларидан “монстр” деган таърифни олган.

Лансликлар унинг трансферини 25 миллион фунтга баҳоламоқда, - деб ёзди teamtalk.com портали эксперти Киаран Маккарти.

TEAMtalk экспертининг таъкидлашича, “Челси” бундан кейин ҳам трансфер бозоридаги фаоллигини пасайтирмайди. Айни пайтда “аристократлар” бир неча чиқиш трансферларини тайёрламоқда. Режага кўра, ҳимоя чизиғида ҳам ўзгаришлар бўлади.

“Челси” ҳимоячиси Бен Чилуэлл клубни тарк этиши кутилмоқда. 27 ёшли футболчига “Боруссия Дортмунд”дан иш чиқяпти. Кани Чуквуэмека “Барселона”га ўтишга яқин ва унинг трансферини лондонликлар 30 миллион фунтга баҳолаяпти.

“Аристократлар” таклиф этиладиган ўйинчилар рўйхатига “Ланс”дан ҳимоячи Абдуқодир Ҳусанов, “Ипсвич Таун”дан ҳужумчи Лиам Делап, “Ньюкасл” тўпурари Александр Исаакни киритган.

Экспертлар Абдуқодир Ҳусанов Англия Премьер-лигасининг бирор клубига кўчиб ўтса, бу тарихий трансфер бўлишини мълум қилди. Чунки бу турнирда шу пайтга қадар бирор ўзбек футболчиси тўп тепмаган.

Абдуқодир Ҳусановда Англия Премьер-лигасига қадам қўйган биринчи ўзбекистонлик чарм тўп устаси сифатида тарихда ном қолдириш имкони бор. Қолаверса, хорижлик мутахассислар истеъдодли ҳимоячи тез орада машҳурлик бобида чет эл лигаларида тўп тепаётган ўзбек легионерларининг барчасини, хусусан, “Рома”да тўп тепаётган Элдор Шомуродовдан ҳам ўзиб кетишини таъкидламоқда.